ബോക്സ്‌ ഓഫീസ് കുലുക്കി ചാക്കോച്ചന്റെ ഓഫീസര്‍ ഓണ്‍ ഡ്യൂട്ടി; കളക്ഷൻ റിപ്പോർട്ടുകൾ പുറത്ത്

കുഞ്ചാക്കോ ബോബൻ നായകനായി വന്ന ‘ഓഫീസര്‍ ഓണ്‍ ഡ്യൂട്ടി’യുടെ കളക്ഷൻ റിപ്പോർട്ടുകളാണ് പുറത്തുവന്നത്. ഓഫീസര്‍ ഓണ്‍ ഡ്യൂട്ടിയുടെ തിങ്കളാഴ്‍ചത്തെ കളക്ഷൻ മികച്ച പ്രതീക്ഷ നല്‍കുന്നതാണ്. ഓഫീസര്‍ ഓണ്‍ ഡ്യൂട്ടി ഞായറാഴ്‍ച മാത്രം നേടിയത് 1.71കോടി രൂപയാണ്. ചിത്രം 20 കോടിയോളമാണ് ആകെ നേടിയിരിക്കുന്നത്.

ഒരു ഇൻവെസ്റ്റിഗേഷൻ ത്രില്ലര്‍ ആയിട്ടാണ് ഓഫീസര്‍ ഓണ്‍ ഡ്യൂട്ടി പ്രദര്‍ശനത്തിനെത്തിയത്. ഓഫീസര്‍ ഓണ്‍ ഡ്യൂട്ടിയില്‍ നായിക കഥാപാത്രത്തെ അവതരിപ്പിക്കുന്നത് പ്രിയാമണിയാണ്. നായാട്ട്, ഇരട്ട എന്നീ ഹിറ്റ് ചിത്രങ്ങളിലൂടെ പ്രേക്ഷക ശ്രദ്ധ ആകർഷിച്ച നടനായ ജിത്തു അഷ്റഫാണ് സംവിധായകൻ.

മാർട്ടിൻ പ്രക്കാട്ട് ഫിലിംസ്, ഗ്രീൻ റൂം പ്രൊഡക്ഷൻസ് എന്നീ കമ്പനികളുടെ ബാനറിൽ മാർട്ടിൻ പ്രക്കാട്ട്, സിബി ചാവറ, രഞ്‍ജിത്ത് നായർ എന്നിവ‍‍ര്‍ ചേർന്നാണ് ചിത്രം നിർമിച്ചിരിക്കുന്നത്. ‘പ്രണയ വിലാസ’ത്തിന് ശേഷം ഈ ടീം വീണ്ടും ഒന്നിക്കുന്ന സിനിമയാണിത്. ‘ജോസഫ്’, ‘നായാട്ട്’ സിനിമകളുടെ തിരക്കഥാകൃത്ത് ഷാഹി കബീറാണ് സിനിമയുടെ രചന. ഗ്രീൻ റൂം പ്രൊഡക്ഷൻസിലൂടെ ഡ്രീം ബിഗ് ഫിലിംസാണ് ചിത്രം വിതരണത്തിന് എത്തിച്ചിരിക്കുന്നത്.