ബസിനെ മറികടക്കാൻ ശ്രമിക്കുന്നതിനിടെ അപകടം; ഐഎസ്ആർഒ ജീവനക്കാരൻ മരിച്ചു

തിരുവനന്തപുരം: ബൈക്കും ടൂറിസ്റ്റ് ബസും കൂട്ടിയിടിച്ച് ഐഎസ്ആർഒ ജീവനക്കാരൻ മരിച്ചു. ഇന്നലെ രാത്രി ദേശീയപാതയിൽ ചാത്തൻപാറയ്ക്ക് സമീപമാണ് അപകടം ഉണ്ടായത്. നെടുംപറമ്പ് ഞാറക്കാട്ടുവിള സ്വദേശി ശ്യാംകുമാർ (27) ആണ് മരിച്ചത്. രാത്രി 9 മണിയോടെയായിരുന്നു അപകടം. കരുനാഗപ്പള്ളിയിൽ നിന്നും തിരുവനന്തപുരം ഭാഗത്തേക്ക് പോവുകയായിരുന്ന ടൂറിസ്റ്റ് ബസ് ബൈക്കിലിടിച്ചാണ് അപകടം ഉണ്ടായത്. ശ്യാംകുമാർ അമിത വേഗത്തിലായിരുന്നു. ടുറിസ്റ്റ് ബസിനെ മറികടക്കാൻ ശ്രമിക്കുന്നതിനിടയിലാണ് അപകടം ഉണ്ടായതെന്ന് പൊലീസ് പറഞ്ഞു.

അപകടത്തിൽ ഗുരുതരമായി തലയ്ക്കുൾപ്പടെ പരിക്കേറ്റ യുവാവിനെ സമീപത്തെ സ്വകാര്യ ആശുപത്രിയിൽ എത്തിച്ചു. എന്നാൽ നില ഗുരുതരമായതോടെ പാരിപ്പള്ളി മെഡിക്കൽ കോളെജിലേക്ക് മാറ്റി. എങ്കിലും ജീവൻ രക്ഷിക്കാനായില്ല. അപകടത്തില്‍ കല്ലമ്പലം പൊലീസ് കേസെടുത്തിട്ടുണ്ട്.