മൈസൂരുവി‌ൽ കാർ നിയന്ത്രണം വിട്ട് മറിഞ്ഞു; മലയാളി യുവതിക്ക് ദാരുണാന്ത്യം

മാനന്തവാടി: മൈസൂരുവി‌ലുണ്ടായ വാ​ഹനാപകടത്തിൽ മലയാളി യുവതിക്ക് ദാരുണാന്ത്യം. മാനന്തവാടി സ്വദേശിനിയായ നൃത്ത അധ്യാപിക അലീഷ ആണ് മരിച്ചത്. റിട്ടയർഡ് പൊലീസ് ഉദ്യോഗസ്ഥനായ ശാന്തി നഗറിലെ ജോസിയുടെയും, റീനയുടെയും മകളാണ് അലീഷ. വ്യാഴാഴ്ച അർധരാത്രിയോടെയാണ് അലീഷയും ഭർത്താവ് ജോബിനും സഞ്ചരിച്ച കാർ അപകടത്തിൽപെട്ടത്. ബെംഗളൂരുവിലെ നൃത്ത പരിപാടിക്കായി പോകവെ ഇരുവരും സഞ്ചരിച്ചിരുന്ന കാർ നിയന്ത്രണംവിട്ട് മറിയുകയായിരുന്നു.

അപകടത്തിൽ ഗുരുതരമായി പരിക്കേറ്റ അലീഷയെ മൈസൂരുവിലെ ആശുപത്രിയിൽ പ്രവേശിപ്പിച്ചു. തുടർ ചികിത്സയ്ക്കായി അലീഷയെ നാട്ടിലേക്ക് കൊണ്ടു വരുന്നതിനിടെ ഗുണ്ടൽപേട്ടിൽ വെച്ച് ആരോഗ്യ സ്ഥിതി വഷളാകുകയും മരണം സംഭവിക്കുകയുമായിരുന്നു.

മാനന്തവാടിയിൽ എബിസിഡി എന്ന നൃത്ത വിദ്യാലയം നടത്തിവരികയായിരുന്നു യുവതി. ടിവി ചാനലുകളിലും മറ്റും ധാരാളം റിയാലിറ്റി ഷോകളിൽ പങ്കെടുത്ത താരം കൂടിയാണ് അലീഷ. അപകടത്തിൽ പരുക്കേറ്റ ഭർത്താവ് ജോബിൻ ചികിത്സയിൽ കഴിയുകയാണ്. മകൾ: എലൈന എഡ്വിഗ ജോബിൻ.