മത്സര ഫോർമാറ്റിൽ മാറ്റം വരുത്താനൊരുങ്ങി ലോക ബാഡ്മിന്റൻ ഫെഡറേഷൻ

ന്യൂഡൽഹി: ബാഡ്മിന്റൻ മത്സരങ്ങൾ ചെറുതാകുന്നു. 15 പോയിന്റുകൾ വീതമുള്ള മൂന്ന് ഗെയിമുകളുമായി പുതിയ സ്കോറിങ് സിസ്റ്റം മത്സരങ്ങളിൽ നടപ്പാക്കാനൊരുങ്ങി ലോക ബാഡ്മിന്റൻ ഫെഡറേഷൻ (ബിഡബ്ല്യുഎഫ്). നിലവിൽ 21 പോയിന്റുകൾ വീതമുള്ള മൂന്ന് ഗെയിമുകളായാണ് മത്സരങ്ങൾ നടത്തുന്നത്.

ഈ വർഷം ഏപ്രിൽ മുതൽ തിരഞ്ഞെടുക്കപ്പെടുന്ന ദേശീയ, രാജ്യാന്തര മത്സരങ്ങളിൽ പുതിയ സ്കോറിങ് സിസ്റ്റം പരീക്ഷണാടിസ്ഥാനത്തിൽ നടപ്പാക്കുമെന്നാണ് വിവരം. പ്രായോഗികമെങ്കിൽ അടുത്തവർഷത്തെ (ബിഡബ്ല്യുഎഫ്) ജനറൽ ബോഡിയോഗം ഈ സ്കോറിങ് സിസ്റ്റത്തിന് അന്തിമ അനുമതി നൽകുമെന്നാണ് വിലയിരുത്തൽ.

11 പോയിന്റുകളുടെ അഞ്ച് ഗെയിം, ഏഴ് പോയിന്റുകളുടെ അഞ്ച് ഗെയിം തുടങ്ങിയ സ്കോറിങ് സിസ്റ്റങ്ങൾ മുൻപ് പരീക്ഷിച്ചിരുന്നെങ്കിലും 2006 മുതൽ 3×21 റാലി ഫോർമാറ്റിലാണ് ലോക ബാഡ്മിന്റൻ മത്സരങ്ങൾ നടക്കുന്നത്. ഒന്നര മണിക്കൂറിലധികം നീളുന്ന മത്സരങ്ങൾ ഗെയിമിന്റെ ആകർഷണം കുറയ്ക്കുന്നുവെന്നും കളിക്കാരെ തളർത്തുന്നുവെന്നുമുള്ള വിലയിരുത്തലിലാണ് മത്സരം പുതിയ ഫോർമാറ്റിലേക്ക് ചുരുക്കുന്നത്.