വില്പനയിൽ ഇടിവ് ; നഷ്ടം നേരിട്ട് ടാറ്റ മോട്ടോഴ്‌സ്

ടാറ്റ മോട്ടോഴ്‌സ് 2025 ജനുവരിയിൽ മൊത്തം 80,304 യൂണിറ്റിന്റെ വിൽപ്പനയാണ് രേഖപ്പെടുത്തിയത്. കഴിഞ്ഞ വർഷം ജനുവരി 2024 നെ അപേക്ഷിച്ച് ഏഴ് ശതമാനം കുറവാണിത്. കഴിഞ്ഞ വർഷം ഇതേ മാസത്തിൽ കമ്പനി 86,125 യൂണിറ്റുകൾ വിറ്റഴിച്ചിരുന്നു. കമ്പനിയുടെ മൊത്തം ആഭ്യന്തര വിൽപ്പന 78,159 യൂണിറ്റാണ്, ഇത് കഴിഞ്ഞ വർഷം ജനുവരി 2024 ലെ 84,276 യൂണിറ്റുമായി താരതമ്യപ്പെടുത്തുമ്പോൾ ഏഴ് ശതമാനം ഇടിവാണ് ഉണ്ടായത്.

ടാറ്റ മോട്ടോഴ്‌സിൻ്റെ പാസഞ്ചർ കാറുകളുടെ വിൽപ്പന 48,316 യൂണിറ്റായിരുന്നു , ഇത് 2024 ജനുവരിയിൽ 54,033 യൂണിറ്റായിരുന്നു. അതായത് കമ്പനിയുടെ ഈ പ്രധാന വിഭാഗത്തിൽ 11 ശതമാനം ഇടിവുണ്ടായി. ടാറ്റ മോട്ടോഴ്‌സിൻ്റെ ഇവി വിഭാഗത്തിലാണ് ഏറ്റവും വലിയ ആഘാതം കണ്ടത്. 2025 ജനുവരിയിൽ കമ്പനിയുടെ മൊത്തം ഇവി വിൽപ്പന 5,240 യൂണിറ്റായിരുന്നു. അതേസമയം 2024 ജനുവരിയിൽ 6,979 യൂണിറ്റുകൾ വിറ്റു, അതായത് ഇവി വിൽപ്പനയിൽ 25% ഇടിവ് രേഖപ്പെടുത്തി.

കമ്പനിയുടെ വാണിജ്യ വാഹനങ്ങളുടെ (സിവി) വിൽപ്പനയിലും നേരിയ ഇടിവുണ്ടായി. 2025 ജനുവരിയിൽ കമ്പനി 31,988 യൂണിറ്റുകൾ വിറ്റഴിച്ചപ്പോൾ കഴിഞ്ഞ വർഷം 2024 ജനുവരിയിൽ 32,092 യൂണിറ്റുകൾ വിറ്റു. ടാറ്റ മോട്ടോഴ്‌സിൻ്റെ ഇവി വിപണി വിഹിതം 2023ൽ 73 ശതമാനമായിരുന്നു. ഇത് 2024ൽ 62 ശതമാനമായി കുറഞ്ഞു. എംജി മോട്ടോർ, മഹീന്ദ്ര , ഹ്യുണ്ടായ് , മാരുതി സുസുക്കി തുടങ്ങിയ കമ്പനികൾ പുറത്തിറക്കിയ പുതിയ ഇവികൾ ആണിതിന് പ്രധാന കാരണം.