മോദിയെക്കാൾ കൗശലക്കാരൻ : കെജ്‌രിവാളിനെതിരേ രൂക്ഷ വിമർശനവുമായി രാഹുൽ ഗാന്ധി

ന്യൂഡൽഹി: നിയമസഭാതിരഞ്ഞെടുപ്പിന് മുന്നോടിയായുള്ള കോൺഗ്രസ് പ്രചാരണത്തിൽ കെജ്‌രിവാളിനെതിരേ വാക്കുകൊണ്ടുള്ള ആക്രമണം കടുപ്പിച്ച് ലോക്‌സഭാ പ്രതിപക്ഷനേതാവ് രാഹുൽ ഗാന്ധി. പ്രധാനമന്ത്രി നരേന്ദ്രമോദിയെപ്പോലെ നുണപറയുന്നയാളാണ് കെജ്‌രിവാളെന്ന് രാഹുൽ ആരോപിച്ചു.

‘‘മോദിയെക്കാൾ കൗശലക്കാരനാണ് കെജ്‌രിവാൾ. അതുകൊണ്ട് ആരാണ് ഭരണഘടനയെ സംരക്ഷിക്കുന്നതെന്ന് നോക്കി വോട്ടുചെയ്യണം.’’ -രാഹുൽ പറഞ്ഞു. ഇതോടെ തുടർച്ചയായ മൂന്നാംദിവസമാണ് രാഹുൽ കെജ്‌രിവാളിനെതിരേ ആരോപണമുന്നയിക്കുന്നത്.

ബി.ജെ.പി.യെ തോൽപ്പിക്കാൻ ആം ആദ്മി പാർട്ടിയെ ജയിപ്പിക്കണമെന്നും വോട്ട് പാഴാക്കരുതെന്നും സമാജ്‌വാദി പാർട്ടി നേതാവ് അഖിലേഷ് യാദവ് പറഞ്ഞു. ഡൽഹിയിൽ എ.എ.പിക്കുവേണ്ടി അരവിന്ദ് കെജ്‌രിവാളിനൊപ്പം നടത്തിയ സംയുക്ത പ്രചാരണത്തിലാണ് പ്രസ്താവന. കോൺഗ്രസിന് വോട്ട്‌ കൊടുത്താൽ ബി.ജെ.പിക്കെതിരായ വോട്ട് ഭിന്നിച്ചുപോകുമെന്നും അതവർക്ക് ഗുണമാകുമെന്നുമാണ് എ.എ.പി. പ്രചാരണം.

അതേസമയം ഒന്നിച്ചുനിന്നില്ലെങ്കിൽ രക്ഷയുണ്ടാകില്ലെന്നും സംസ്കാരത്തിനെതിരായ ആക്രമണങ്ങളിൽ ഐക്യം വേണമെന്നും മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നവിസ് പറഞ്ഞു. 2020-ൽ കലാപം നടന്ന വടക്കുകിഴക്കൻ ഡൽഹിയിലെ ബി.ജെ.പി. പ്രചാരണത്തിനിടെയായിരുന്നു ഫഡ്‌നാവിസിന്റെ പ്രസ്താവന.