ബ്രേക്ക് നഷ്ടപ്പെട്ട സ്കൂൾ ബസ് വൈദ്യുതിത്തൂണിലിടിച്ചു

മങ്കട : ബ്രേക്ക് നഷ്ടപ്പെട്ട സ്കൂൾ ബസ് വൈദ്യുതിത്തൂണിലിടിച്ചു. വടക്കാങ്ങര ടി.എസ്.എസ്. ഹൈസ്കൂളിന്റെ ബസ്സാണ് അപകടത്തിൽപ്പെട്ടത്. നിയന്ത്രണം നഷ്ടപ്പെട്ട ബസ് ഡ്രൈവർ സമയോചിതമായി ഇടപെട്ട് വൈദ്യുതിത്തൂണിൽ ഇടിപ്പിച്ച് നിർത്തുകയായിരുന്നു.

വടക്കാങ്ങര തടത്തിൽകുണ്ടിൽ വെള്ളിയാഴ്ച രാവിലെയാണ് അപകടം ഉണ്ടായത്.
സ്കൂൾ കുട്ടികളെ കൊണ്ടുവരാൻ ബസ്സെടുത്ത് അല്പം നീങ്ങിയപ്പോൾത്തന്നെ ബ്രേക്ക് പൂർണമായി നഷ്ടപ്പെട്ടു. ‌

കവലയിൽ വിദ്യാർഥികളും പൊതുജനങ്ങളും വാഹനം കാത്തുനിൽക്കുകയായിരുന്നു. ഇതുകണ്ട് ഡ്രൈവർ തൊട്ടടുത്തുള്ള വൈദ്യുതിത്തൂണിൽ ഇടിപ്പിച്ച് വണ്ടി നിർത്തുകയായിരുന്നു.