തിരുവനന്തപുരം മൃഗശാലയിൽ പുതിയ അതിഥികൾ എത്തി

തിരുവനന്തപുരം : തിരുവനന്തപുരം മൃഗശാലയിൽ പുതിയ അതിഥികൾ എത്തി.കർണാടകയിലെ ശിവമോഗ സുവോളജിക്കൽ പാർക്കിൽ നിന്ന് അനിമൽ എക്‌സ്‌ചേഞ്ച് പ്രോഗ്രാമിലൂടെ മൃഗശാലയിലേക്ക് മൃഗങ്ങളെ എത്തിച്ചത്.

മൂന്ന് കഴുതപ്പുലികൾ, രണ്ട് കുറുനരികൾ, രണ്ട് മാർഷ് മുതലകൾ, രണ്ട് മരപ്പട്ടികൾ എന്നിവയെയാണ് ബുധനാഴ്ച മൃഗശാലയിൽ എത്തിച്ചത്.ഇവയ്ക്ക് പകരമായി നാല് റിയ പക്ഷികൾ, ആറ് സൺ കോണ്വർ തത്തകൾ, രണ്ട് മീൻ മുതലകൾ, ഒരു കഴുതപ്പുലി, നാല് മുള്ളൻ പന്നികൾ എന്നിവയെ ശിവമോഗ സുവോളജിക്കൽ പാർക്കിലേക്ക് കൈമാറും.

ശിവമോഗയിൽ നിന്നെത്തിച്ച മൃഗങ്ങളെ പരിശോധനകൾക്ക് ശേഷം ക്വാറന്റൈൻ കേന്ദ്രത്തിലേക്ക് മാറ്റി. നിലവിൽ ആരോഗ്യസ്ഥിതി തൃപ്തികരമാണെന്ന് വെറ്ററിനറി സർജൻ അറിയിച്ചു. പുതിയ മൃഗങ്ങൾ ഉൾപ്പെടെ 94 ഇനം ജീവിവർഗങ്ങൾ നിലവിൽ മൃഗശാലയിലുണ്ട്.