ട്രോളി വിവാദം; ഹോട്ടലിലെ സിസിടിവി ദൃശ്യങ്ങൾ പുറത്ത്

പാലക്കാട്: ട്രോളി ബാഗുമായി ആരോപണ വിധേയനായ ഫെനി നടന്നുപോകുന്നതിന്റെ സിസിടിവി ദൃശ്യങ്ങൾ പുറത്ത്. പാലക്കാട് കെടിഎം ഹോട്ടലിലെ ദൃശ്യങ്ങളാണ് പുറത്തുവന്നിരിക്കുന്നത്. ട്രോളി ബാഗിൽ പണമാണെന്നാണ് സിപിഎമ്മിൻ്റെയും ബിജെപിയുടെ ആരോപണം. ബാഗിൽ വസ്ത്രങ്ങളാണെന്നാണ് യുഡിഎഫ് പറയുന്നത്. ദൃശ്യങ്ങൾ പുറത്തുവിടുമെന്ന് നേരത്തെ സിപിഎം വെല്ലുവിളിച്ചിരുന്നു.ഷാഫി പറമ്പിൽ, വി.കെ. ശ്രീകണ്ഠൻ, ജ്യോതികുമാർ ചാമക്കാല എന്നിവർ ഹോട്ടലിലേക്ക് കയറുന്നതുൾപ്പെടെ ദൃശ്യങ്ങളിലുണ്ട്. 10.13ന് ശ്രീകണ്ഠൻ എംപി വാഷ് റൂമിലേക്ക് പോവുകയും ബാക്കിയുള്ളവർ കോൺഫറൻസ് ഹാളിലേക്ക് കയറുന്നതും കാണാം.

10.39നുള്ള ദൃശ്യത്തിൽ രാഹുൽ കോൺഫറൻസ് ഹാളിലേക്ക് പോകുന്നതാണുള്ളത്. 10.42ന് ഫെനി നൈനാൻ കോറിഡോറിലേക്ക് വരുന്നു. എന്നാൽ ഫെനിയുടെ കയ്യിൽ അപ്പോൾ പെട്ടി ഇല്ല. 10.47 ലുള്ള ദൃശ്യങ്ങളിൽ രാഹുലിനെ കോൺഫറൻസ് ഹാളിൽ നിന്ന് ഇറക്കി മുറിയിലേക്ക് കൊണ്ടു പോകുന്നു.ഈ മുറിയിൽ നിന്ന് കനമുള്ള പെട്ടിയുമായി ഫെനി വരുന്നതും ദൃശ്യങ്ങളിൽ കാണാം. 10.54ന് നീല ട്രോളി ബാഗുമായി ഫെനി തിരിച്ചുവരുന്നു. ശേഷം 10.59ന് രാഹുൽ പുറത്തേക്ക് പോകുന്നതും ദൃശ്യങ്ങളിൽ വ്യക്തമാണ്.