ടൂറിസ്റ്റ് ബസിനടിയിൽപ്പെട്ട് സ്കൂട്ടർ യാത്രക്കാരൻ മരിച്ച സംഭവത്തിൽ ബസ് ഡ്രൈവർ അറസ്റ്റിൽ

കോഴിക്കോട്: കക്കട്ടിൽ ടൂറിസ്റ്റ് ബസിനടിയിൽപ്പെട്ട് സ്‌കൂട്ടർ യാത്രക്കാരൻ മരിച്ച സംഭവത്തിൽ ബസ് ഡ്രൈവർ മലപ്പുറം തച്ചുംപൊയിൽ സ്വദേശി അർഷദ് അറസ്റ്റിൽ. നരിപ്പറ്റ നീർവേലി ക്ഷേത്രത്തിനടുത്തെ കക്കാട്ട് മീത്തൻ രാജേഷാ(45)ണ് മരിച്ചത്. അപകടത്തിൻ്റെ സി.സി.ടിവി ദൃശ്യങ്ങൾ പുറത്ത് വന്നിരുന്നു.കുറ്റ്യാടി -നാദാപുരം സംസ്ഥാന പാതയിൽ ഇന്നലെ വൈകിട്ട് അഞ്ചിനായിരുന്നു അപകടം. നാദാപുരം ഭാഗത്ത് നിന്ന് വരുകയായിരുന്ന ടൂറിസ്റ്റ് ബസ് അതേ ദിശയിൽ പോവുകയായിരുന്ന സ്‌കൂട്ടറിൽ ഇടിക്കുകയായിരുന്നു. സ്കൂട്ടറിലേക്ക് ബസ് ഇടിക്കുകയും ഇടിയുടെ ആഘാതത്തിൽ സ്‌കൂട്ടറിൽ നിന്ന് തെറിച്ച് വീണ രാജേഷ് ബസിന്റെ ചക്രത്തിനടിയിൽപ്പെട്ട് മരിക്കുകയായിരുന്നു. അമിത വേഗത്തിൽ പാഞ്ഞെത്തിയ ടൂറിസ്റ്റ് ബസിൻ്റെ കാറ്റിൽ രാജേഷ് ഓടിച്ച സ്കൂട്ടറിന്റെ നിയന്ത്രണം വിട്ടുപോകുകയായിരുന്നു.