നവീൻ ബാബു സൗമ്യനായ ഉദ്യോഗസ്ഥൻ;ഫേസ്ബുക്ക് പോസ്റ്റിലൂടെ അനുസ്മ‌രിച്ച് കണ്ണൂർ കലക്ടർ അരുൺ കെ. വിജയൻ

കോഴിക്കോട്: കണ്ണൂരിൽ ക്വാട്ടേഴ്‌സിൽ മരിച്ച നിലയിൽ കണ്ടെത്തിയ എ.ഡി.എം നവീൻ ബാബുവിനെ അനുസ്മ‌രിച്ച് കണ്ണൂർ കലക്ടർ അരുൺ കെ. വിജയൻ. ഫേസ്ബുക്ക് പോസ്റ്റിലൂടെയാണ് സഹപ്രവർത്തകനെ കലക്ടർ അനുസ്‌മരിച്ചത്. നവീൻ ബാബു സൗമ്യനായ നല്ല ഉദ്യോഗസ്ഥനായിരുന്നുവെന്ന് കലക്ടർ അരുൺ കെ. വിജയൻ അനുസ്‌മരിച്ചു.
ഫേസ്ബുക്ക് പോസ്റ്റിന്റെ പൂർണരൂപം:സഹപ്രവർത്തകനായ കണ്ണൂർ ജില്ല അഡീഷണൽ ഡിസ്ട്രിക്ട് മജിസ്ട്രേറ്റ് ശ്രീ നവീൻ ബാബുവിന്റെ വിയോഗത്തിൽ അഗാധമായ അനുശോചനം രേഖപ്പെടുത്തുന്നു.സൗമ്യനായി ഒരു നല്ല ഉദ്യോഗസ്ഥനായിരുന്നു അദ്ദേഹം. സർവീസിൽ സേവനമനുഷ്‌ഠിച്ച എല്ലായിടത്തും സഹപ്രവർത്തകരുടെ സ്നേഹാദരങ്ങൾ അദ്ദേഹം നേടിയെടുത്തിട്ടുണ്ട്.നടപടിക്രമങ്ങൾ പൂർത്തിയാക്കി അദ്ദേഹത്തിൻ്റെ ഭൗതികശരീരം കുടുംബത്തിന് കൈമാറി. സംസ്കാര ചടങ്ങുകൾ നാളെ ഉച്ചയ്ക്ക് ശേഷം പത്തനംതിട്ടയിൽ നടക്കും. വളരെ ദൗർഭാഗ്യകരമായ ഈ സന്ദർഭത്തിൽ അദ്ദേഹത്തിൻ്റെ കുടുംബത്തിൻ്റെ ദുഃഖത്തിൽ പങ്ക് ചേരുന്നു.