കേസെടുത്തതിൽ സങ്കടം; കണ്ണുനിറഞ്ഞ് മനാഫ്

കോഴിക്കോട്:അർജുന്‍റെ കുടുംബത്തിന്‍റെ പരാതിയിൽ കേസെടുത്തതിന് പിന്നാലെയാണ് മനാഫ് മാധ്യമങ്ങളോട് പ്രതികരിച്ചത്. അര്‍ജുന്‍റെ സഹോദരി അഞ്ജുവിന്‍റെ പരാതിയില്ലാണ് മനാഫിനെതിരെ പോലീസ് കേസെടുത്തത്. സൈബർ ആക്രമണങ്ങൾ വർധിച്ചതിനെത്തുടർന്ന് കോഴിക്കോട് സിറ്റി പോലീസ് കമ്മീഷണർക്കാണ് കുടുംബം പരാതി നൽകിയത്. സോഷ്യൽ മീഡിയയിൽ മാധ്യമങ്ങളിൽ വർഗീയ അധിക്ഷേപം നടക്കുന്നുവെന്നാണ് പരാതിയിൽ പറയുന്നത്.വിതുമ്പിക്കൊണ്ടായിരുന്നു പ്രതികരണം. കേസെടുത്ത കാര്യം രാവിലെയാണ് അറിയുന്നത്. മതങ്ങളെ യോജിപ്പിക്കാനാണ് പ്രവർത്തിക്കുന്നത്. തമ്മിൽ തല്ലിപ്പിക്കുന്നത് താൻ ഒരിക്കലും ചെയ്യില്ലെന്ന് മനാഫ് പറഞ്ഞു.അർജുന്‍റെ കുടുംബത്തിനെതിരായ സൈബർ ആക്രമണത്തിന്‍റെ പേരിൽ കേസെടുത്തതിൽ സങ്കടമുണ്ടെന്ന് ലോറി ഉടമ മനാഫ്. തനിക്കെതിരെ കേസെടുത്തതില്‍ സങ്കടമുണ്ടെങ്കിലും അര്‍ജന്‍റെ കുടുംബത്തിനൊപ്പം നില്‍ക്കുമെന്ന് അദ്ദേഹം പറഞ്ഞു. അർജുനെ കിട്ടിയതോടെ സമാധാന ജീവിതം കിട്ടുമെന്നാണ് വിചാരിച്ചത്. എന്നാൽ അതുണ്ടായില്ലെന്നും മനാഫ് പറയുന്നു. ഈ സമയം വരെ അർജുന്‍റെ കുടുംബത്തിന് അനുകൂലമായിട്ടാണ് നിന്നത്. ഇനി അങ്ങോട്ടും അവരുടെ കൂടെതന്നെ ആകും. എങ്ങനെ കേസിൽ കൂടുക്കിയാലും ശിക്ഷിച്ചാലും ഞാൻ അവരെക്കൂടെത്തന്നെയാണ്’ മനാഫ് പറഞ്ഞു.അവരെ അപകീര്‍ത്തിപ്പെടുത്തുന്ന ഒന്നും ഒരിടത്തും പറഞ്ഞിട്ടില്ല. എനിക്കെതിരെ എന്താണ് പരാതിയെന്നും അറിയില്ല. തന്‍റെ യൂ ട്യൂബ് ചാനല്‍ എല്ലാവര്‍ക്കും ലഭ്യമാണല്ലോ. അതില്‍ എന്താണ് അവര്‍ക്കെതിരെ പറഞ്ഞിട്ടുള്ളതെന്ന് പരിശോധിക്കാമെന്നും മനാഫ് മാധ്യമങ്ങളോടു പറഞ്ഞു.

അർജുന്‍റെ ഭാര്യ കൃഷ്ണ പ്രിയ, സഹോദരി അഞ്ജു, സഹോദരീ ഭർത്താവ് ജിതിൻ എന്നിവർ കമീഷണർ ഒഫീസിൽ എത്തിയാണ് പരാതി നൽകിയത്. ലോറി ഉടമ മനാഫിനെതിരെ അർജുന്‍റെ കുടുംബം കഴിഞ്ഞദിവസം രംഗത്തെത്തിയിരുന്നു. വൈകാരികതയെ ചൂഷണം ചെയ്യുകയാണെന്നായിരുന്നു കുടുംബം മനാഫിനെതിരെ ആരോപണം ഉന്നയിച്ചത്. ഇതിനു ശേഷമാണ് സോഷ്യൽ മീഡിയയിൽ അർജുന്‍റെ കുടുംബത്തിനു നേരെ സൈബർ ആക്രമണം ആരംഭിച്ചത്.അതേസമയം അർജുന്‍റെ കുടുംബത്തെ വേട്ടയാടരുതെന്നും സൈബർ ആക്രമണം അവസാനിപ്പിക്കണമെന്നും ലോറിയുടമയായ മനാഫ് ഇന്നലെ പറഞ്ഞിരുന്നു. സഹോദരൻ മുബീൻ ഉൾപ്പെടെ കുടുംബത്തിനൊപ്പം നടത്തിയ പത്രസമ്മേളനത്തിലാണ് മനാഫ് ഇക്കാര്യം പറഞ്ഞത്. അർജുന്‍റെ രക്ഷാപ്രവർത്തനവുമായി ബന്ധപ്പെട്ട് പി ആർ വർക്ക് നടത്തിയിട്ടില്ലെന്നും വൈകാരികമായ മുതലെടുപ്പ് നടത്തിയിട്ടില്ലെന്നും മനാഫ് പറഞ്ഞിരുന്നു.