പുണെ ജില്ലാ കളക്ടർ ജിതേന്ദ്ര ദുഢി, യുസിഐ വൈസ് പ്രസിഡന്റും ഏഷ്യൻ സൈക്ലിംഗ് ഫെഡറേഷൻ പ്രസിഡന്റുമായ അമർജിത് സിംഗ് ഗിൽ എന്നിവർ യൂണിയൻ സൈക്ലിസ്റ്റ് ഇന്റർനാഷണൽ പ്രസിഡന്റ് ഡേവിഡ് ലപ്പാർഷ്യന്റിനൊപ്പം.
കൊച്ചി: 2032ലെ യൂണിയൻ സൈക്ലിസ്റ്റ് ഇന്റർനാഷണൽ റോഡ് വേൾഡ് ചാംപ്യൻഷിപ്പിന് പുണെ വേദിയാകും. ചാംപ്യൻഷിപ്പ് വേദി സംബന്ധിച്ച യോഗ്യത മാനദണ്ഡങ്ങളിൽ വിജയിച്ചതോടെയാണ് പുണെയെ തിരഞ്ഞെടുത്തത്. ആദ്യമായാണ് ഇന്ത്യ, റോഡ് വേൾഡ് ചാംപ്യൻഷിപ്പിന് ആതിഥ്യം വഹിക്കുന്നത്. അന്താരാഷ്ട്ര സൈക്ലിംഗ് മത്സരങ്ങൾ സംഘടിപ്പിക്കാൻ ശേഷിയുള്ള ആഗോള നിലവാരത്തിലുള്ള ട്രാക്കുകളാണ് പുണെയിൽ സജീകരിച്ചിട്ടുള്ളത്. സൈക്ലിംഗ് ഫെഡറേഷൻ ഓഫ് ഇന്ത്യയുടേയും (സിഎഫ്ഐ) മഹാരാഷ്ട്ര സർക്കാരിന്റെയും ശ്രമഫലമായാണ് ചാമ്പ്യൻഷിപ്പ് നടത്താനുള്ള അവസരം ലഭിച്ചത്. ആഗോള സൈക്ലിംഗ് കേന്ദ്രമായി ഉയർത്തുന്നതിന്റെ ഭാഗമായി പുണെയിൽ നിരവധി മത്സരങ്ങൾ സംഘടിപ്പിച്ചിട്ടുണ്ട്.
ബലെവാഡി സ്റ്റേഡിയം, പുണെ സർവകലാശാല സർക്യൂട്ട് എന്നിവിടങ്ങളിലാണ് മത്സരങ്ങൾ നടക്കുക. സെപ്റ്റംബർ 4ന് യൂണിയൻ സൈക്ലിസ്റ്റ് ഇന്റർനാഷണൽ (യുസിഐ) അധികൃതർ നടത്തിയ പരിശോധനയിൽ സ്റ്റേഡിയവും അനുബന്ധ ട്രാക്കുകളും ചാംപ്യൻഷിപ്പിന് അനുയോജ്യമാണെന്ന് വിലയിരുത്തിയിരുന്നു. അന്താരാഷ്ട്ര സൈക്ലിംഗ് മത്സരങ്ങൾ സംഘടിപ്പിക്കാൻ ശേഷിയുള്ള രാജ്യമാണ് ഇന്ത്യയെന്നും, കൂടുതൽ മത്സരങ്ങൾ പുണെയിലേക്ക് കൊണ്ടുവരുന്നതിനുള്ള മികച്ച അവസരമാണ് ചാംപ്യൻഷിപ്പിലൂടെ കൈവരുന്നതെന്നും യുസിഐ പ്രസിഡന്റ് ഡേവിഡ് ലപ്പാർഷ്യന്റ് പറഞ്ഞു. സൈക്ലിംഗ് മേഖലയിൽ അനന്തമായ ഭാവിയാണ് രാജ്യത്തിനുള്ളതെന്നും അദ്ദേഹം കൂട്ടിച്ചേർത്തു.
ആഗോള സൈക്ലിംഗ് മേഖലയുടെ പ്രധാന വേദിയാകുകയാണ് പുണെയുടെ ലക്ഷ്യമെന്നും കായിക അനുബന്ധ ബിസിനസുകൾ വികസിപ്പിക്കുന്നതിന് ചാംപ്യൻഷിപ്പ് ഏറെ സഹായകരമാകുമെന്നും പുണെ ജില്ലാ കളക്ടർ ജിതേന്ദ്ര ദുഢി പറഞ്ഞു. 2036ലെ ഒളിംപിക്സിൽ സൈക്ലിംഗ് ഇനത്തിൽ പങ്കെടുക്കാനുള്ള രാജ്യത്തിന്റെ ശ്രമങ്ങൾക്ക് കൂടുതൽ കരുത്തേകുന്നതാണ് റോഡ് വേൾഡ് ചാംപ്യൻഷിപ്പിനുള്ള ആതിഥേയത്വം.