സ്മാർട്ട്‌ഫോൺ ഉപയോക്താക്കൾക്ക് ഗുരുതരമായ ഭീഷണിയുമായി ഗൂഗിൾ പ്ലേ സ്റ്റോറിലെ 20 മാൽവെയർ ആപ്പുകൾ

തിരുവനന്തപുരം: സ്മാർട്ട്‌ഫോൺ ഉപയോക്താക്കൾക്ക് ഗുരുതരമായ ഭീഷണിയുമായി ഗൂഗിൾ പ്ലേ സ്റ്റോറിലെ 20 മാൽവെയർ ആപ്പുകൾ. മുന്നറിയിപ്പുമായി സൈബർ സുരക്ഷാ സ്ഥാപനമായ സൈബിൾ റിസർച്ച് ആൻഡ് ഇന്‍റലിജൻസ് ലാബ്‌സ്. ക്രിപ്‌റ്റോകറൻസി വാലറ്റുകളുടെ രൂപത്തിലുള്ളവയാണ് ഈ ആപ്ലിക്കേഷനുകൾ. വാലറ്റ് റിക്കവറികൾ പോലുള്ള സെൻസിറ്റീവ് ഉപയോക്തൃ ഡാറ്റകൾ ചോർത്താൻ ലക്ഷ്യംവച്ചാണ് ഇത്തരം ആപ്പുകൾ പ്രവർത്തിക്കുന്നത്. ഫിഷിംഗ് ആക്രമണങ്ങളും സാമ്പത്തിക നഷ്‍ടങ്ങളും ഒഴിവാക്കാൻ ഉപയോക്താക്കൾ ഈ ആപ്പുകള്‍ ഫോണില്‍ നിന്ന് ഉടനടി നീക്കംചെയ്യണം എന്നാണ് മുന്നറിയിപ്പ്.

ഒറ്റനോട്ടത്തിൽ ഈ ആപ്പുകൾ യഥാർഥമാണെന്ന് തോന്നിപ്പിക്കും. പക്ഷേ യഥാർഥത്തിൽ അവ നിങ്ങളുടെ ഏറ്റവും സെൻസിറ്റീവ് സാമ്പത്തിക ക്രെഡൻഷ്യലുകൾ മോഷ്ടിക്കാൻ രൂപകൽപ്പന ചെയ്‌തിരിക്കുന്ന ഫിഷിംഗ് ക്യാംപയിന്‍റെ ഭാഗമാണ്. ഉപയോക്താക്കളുടെ DeFi വാലറ്റുകൾ ആക്‌സസ് ചെയ്യുന്നതിനുള്ള ഒരു പ്രധാന ഫീച്ചറായ വാലറ്റ് റിക്കവറി ഫ്രേസ് മോഷ്ടിക്കുന്നതിനാണ് ഈ വ്യാജ ക്രിപ്‌റ്റോകറൻസി വാലറ്റ് ആപ്പുകൾ രൂപകൽപ്പന ചെയ്‌തിരിക്കുന്നത്. SushiSwap, PancakeSwap, Raydium, Hyperliquid, Suiet Wallet തുടങ്ങിയ ആപ്പുകൾ ഈ തട്ടിപ്പിന്‍റെ ഭാഗമാണ്. ഒരു ഉപയോക്താവ് ഇത്തരം ആപ്പ് ഡൗൺലോഡ് ചെയ്‌തുകഴിഞ്ഞാൽ, അത് അവരുടെ 12- വേർഡ് റിക്കവറി ഫ്രേസ് നൽകാൻ ഉപഭോക്താക്കളെ പ്രേരിപ്പിക്കുന്നു. തുടര്‍ന്ന് ഉപയോക്താവിന്‍റെ വാലറ്റിലേക്ക് ആക്‌സസ് ലഭിക്കാനായി സൈബർ കുറ്റവാളികൾ ഈ ഡാറ്റകൾ ശേഖരിക്കും.

ഗെയിമിംഗ്, വീഡിയോ എഡിറ്റിംഗ് ടൂളുകളുമായി ബന്ധിപ്പിച്ചിട്ടുള്ള ഡെവലപ്പർ അക്കൗണ്ടുകൾ ഉപയോഗിച്ചാണ് സൈബർ കുറ്റവാളികൾ ഈ ദോഷകരമായ ആപ്പുകൾ ഗൂഗിള്‍ പ്ലേയില്‍ അപ്‌ലോഡ് ചെയ്യുന്നത്. ആപ്പുകൾ അവരുടെ സ്വകാര്യതാ നയങ്ങൾക്കുള്ളിൽ ഫിഷിംഗ് യുആർഎല്ലുകൾ മറയ്ക്കുകയും ഉപയോക്താക്കളെ തന്ത്രപ്രധാനമായ വിവരങ്ങൾ നൽകാൻ പ്രേരിപ്പിക്കുകയും ചെയ്യുന്നു. യഥാർഥ ക്രിപ്‌റ്റോ വാലറ്റ് ആപ്ലിക്കേഷനുകളുടെ രൂപകൽപ്പനയും പ്രവർത്തനക്ഷമതയും ഈ ആപ്പുകൾ അനുകരിക്കുന്നു.