വില്ലകളിൽ അനധികൃത താമസം; പരിശോധന ശക്​തമാക്കി അബൂദബി

അബൂദബി: വില്ലകള്‍ അനധികൃതമായി വിഭജിച്ച്​ അനുവദനീയമായതില്‍ കൂടുതല്‍ ആളുകളെ പാര്‍പ്പിക്കുന്നത് കണ്ടെത്താൻ പരിശോധന ശക്​തമാക്കി അബൂദബി. അബൂദബി നഗര, ഗതാഗത വകുപ്പിന്‍റെ നേതൃത്വത്തിലാണ്​ എമിറേറ്റിലുടനീളം പരിശോധന വ്യാപകമാക്കിയത്​. നിയമലംഘനങ്ങള്‍ കണ്ടെത്തിയാൽ കടുത്ത നടപടി സ്വീകരിക്കുമെന്ന്​ അധികൃതർ മുന്നറിയിപ്പു നൽകി.

അതേസമയം, കുറഞ്ഞ വരുമാനക്കാരായ താമസക്കാര്‍ക്കായി താങ്ങാന്‍ കഴിയുന്ന വീടുകൾ ലഭ്യമാക്കുന്നതിനുള്ള മാര്‍ഗങ്ങൾ കൂടി തേടുന്നതായി അധികൃതര്‍ അറിയിച്ചു. അബൂദബിയിലെ ജനസംഖ്യ ഉയരുന്നത് തുടരുന്നതിനാല്‍ താങ്ങാവുന്നതും ഗുണമേന്മയുള്ളതുമായ ഭവനങ്ങള്‍ ഉറപ്പുവരുത്തുന്നതിനാണ് മുഖ്യ പരിഗണനയെന്ന് നഗര, ഗതാഗത വകുപ്പ് ഉപദേഷ്ടാവ് മുഹമ്മദ് അല്‍മസാസ്മി പറഞ്ഞു.