കാന്തപുരം എ.പി. അബൂബക്കർ മുസ്ലിയാരെ തള്ളിയ മുഖ്യമന്ത്രിയുടെ നിലപാടിനെതിരായ മുസ്ലിം സംഘടനകളുടെ പ്രതിഷേധത്തിൽ പ്രതികരിച്ച് ആഭ്യന്തരമന്ത്രി രമേശ് ചെന്നിത്തല. സമൂഹത്തിൽ ഓരോരുത്തരും അവരവരുടെ നിലപാടുകൾ വ്യക്തമാക്കുമെന്നും, ഈ വിഷയത്തിലുള്ള തന്റെ നിലപാട് താൻ നേരത്തെ തന്നെ തുറന്നുപറഞ്ഞിട്ടുള്ളതാണെന്നും അദ്ദേഹം വ്യക്തമാക്കി. കുന്നംകുളത്ത് യൂത്ത് കോൺഗ്രസ് നേതാവ് വി.എസ്. സുജിത്തിന് നേരെയുണ്ടായ പൊലീസ് മർദ്ദനത്തിൽ ഉചിതമായ നടപടി ഉണ്ടാകുമെന്നും അദ്ദേഹം ഉറപ്പുനൽകി. സുജിത്തിന്റെ പരാതി ഡിജിപിക്ക് കൈമാറിയിട്ടുണ്ടെന്നും ഐ.ജി. പൂട്ട വിമലാദിത്യയുടെ നേതൃത്വത്തിൽ അന്വേഷണം പുരോഗമിക്കുകയാണെന്നും ചെന്നിത്തല അറിയിച്ചു. മുൻ സർക്കാരിന്റെ കാലത്ത് മൂന്ന് പേർക്കെതിരെ നടപടി സ്വീകരിച്ചിരുന്നതായും, അന്വേഷണ റിപ്പോർട്ട് ലഭിച്ചാലുടൻ കൂടുതൽ നടപടികൾ ഉണ്ടാകുമെന്നും അദ്ദേഹം കൂട്ടിച്ചേർത്തു.
‘ഓപ്പറേഷൻ തൂഫാൻ’ പരിശോധനയ്ക്കിടെ പൊലീസുകാരെ ആക്രമിക്കുന്നവർക്കെതിരെ കർശന നടപടി സ്വീകരിക്കുമെന്ന് ആഭ്യന്തരമന്ത്രി മുന്നറിയിപ്പ് നൽകി. നാടിന്റെ നിലനിൽപ്പിനും തലമുറകളുടെ സംരക്ഷണത്തിനുമാണ് ഓപ്പറേഷൻ തൂഫാൻ നടപ്പിലാക്കുന്നതെന്നും അദ്ദേഹം വ്യക്തമാക്കി. ഡ്യൂട്ടി നിർവഹിക്കുന്ന പൊലീസുകാരെ കയ്യേറ്റം ചെയ്യുന്ന സംഭവങ്ങൾ ശ്രദ്ധയിൽപ്പെട്ടിട്ടുണ്ടെന്നും, രാപ്പകലില്ലാതെ ജോലി ചെയ്യുന്ന പൊലീസിനെ ആക്രമിക്കുന്നവർക്കെതിരെ ശക്തമായ നിയമനടപടി ഉണ്ടാകുമെന്നും അദ്ദേഹം ഊന്നിപ്പറഞ്ഞു.
എസ്.എഫ്.ഐയ്ക്കെതിരായ പൊലീസ് നടപടിയെക്കുറിച്ചുള്ള പ്രതിപക്ഷ നേതാവിന്റെ ആരോപണങ്ങൾക്ക് മറുപടിയായി, എസ്.എഫ്.ഐ എന്തിനാണ് സമരം ചെയ്യുന്നതെന്ന് വ്യക്തമാക്കാൻ അദ്ദേഹം ആവശ്യപ്പെട്ടു. എസ്.എഫ്.ഐ പ്രവർത്തകർ എ.സി.പിയുടെ കഴുത്തിന് കുപ്പിപ്പിടിക്കുകയും പൊലീസിനെ മർദ്ദിക്കുകയുമാണ് ചെയ്തതെന്നും, പൊലീസ് അങ്ങേയറ്റം സംയമനമാണ് പാലിച്ചതെന്നും ചെന്നിത്തല കുറ്റപ്പെടുത്തി.
മുഖ്യമന്ത്രിയുടെ സോഷ്യൽ മീഡിയ കോർഡിനേറ്റർ എന്നവകാശപ്പെടുന്നയാൾ അറസ്റ്റിലായ കേസിന്റെ അന്വേഷണം കൃത്യമായ രീതിയിലാണ് മുന്നോട്ട് പോകുന്നതെന്നും പ്രതികളെല്ലാം ജയിലിലാണെന്നും അദ്ദേഹം വ്യക്തമാക്കി. ഒന്നാം പ്രതി ഹുസൈന്റെ ഫോൺ പരിശോധിച്ചതിൽ നിന്നാണ് മറ്റ് പ്രതികളെക്കുറിച്ചുള്ള നിർണായക വിവരങ്ങൾ ലഭിച്ചത്. അന്വേഷണ പുരോഗതിയുടെ വിശദാംശങ്ങൾ മാധ്യമങ്ങൾക്ക് മുൻപിൽ വെളിപ്പെടുത്തിയാൽ അത് പ്രതികൾക്ക് രക്ഷപ്പെടാൻ സഹായകരമാകും. അതിനാൽ അന്വേഷണ നടപടിക്രമങ്ങളെക്കുറിച്ചുള്ള ധാരണക്കുറവ് കൊണ്ടോ അല്ലെങ്കിൽ സർക്കാരിനെ രാഷ്ട്രീയമായി വിമർശിക്കാൻ വഴിയന്വേഷിക്കുന്നതിന്റെ ഭാഗമായോ ആണ് ഇത്തരം വിമർശനങ്ങൾ ഉയരുന്നതെന്നും അദ്ദേഹം കൂട്ടിച്ചേർത്തു.