യുക്രൈനിൽ സൈനിക പരിശീലന കേന്ദ്രത്തിന് നേരേ റഷ്യൻ ആക്രമണം; മൂന്നുപേർ കൊല്ലപ്പെട്ടു

കീവ്: യുക്രൈനിൽ സൈനിക പരിശീലന കേന്ദ്രത്തിന് നേരേ റഷ്യൻ ആക്രമണം. വടക്കൻ യുക്രെയ്നിലെ ചെർണീവ് നഗരത്തിലെ സൈനിക പരിശീലന കേന്ദ്രത്തിലാണ് റഷ്യയുടെ മിസൈൽ ആക്രമണമുണ്ടായത് എന്നാണ് സ്ഥിരീകരിക്കാത്ത റിപ്പോർട്ട്. ആക്രമണത്തിൽ മൂന്നുപേർ കൊല്ലപ്പെടുകയും പതിനെട്ട് പേർക്ക് പരിക്കേൽക്കുകയും ചെയ്തു.

സൈനിക യൂണിറ്റിന്റെ പരിശീലന കേന്ദ്രത്തിൽ ആക്രമണം തടയാനുള്ള സുരക്ഷാ ക്രമീകരണങ്ങൾ ചെയ്‌തിരുന്നു എന്നാണ് യുക്രൈൻ സൈന്യം വ്യക്തമാക്കുന്നത്. എന്നാൽ, നാശനഷ്‌ടം പൂർണമായി തടയാൻ സാധിച്ചില്ലെന്നും സൈന്യം അറിയിച്ചു. സൈനിക പരിശീലന കേന്ദ്രത്തിന് നേരേ റഷ്യൻ ആക്രമണമുണ്ടായെന്ന് സ്ഥിരീകരിച്ചെങ്കിലും യുക്രെയ്നിലെ ഏതു മേഖലയിലാണ് ആക്രമണമുണ്ടായതെന്ന് സൈന്യം വ്യക്തമാക്കിയില്ല.

ജൂണിൽ മധ്യ യുക്രെയ്നിലെ പരിശീലന കേന്ദ്രത്തിനു നേരെയുണ്ടായ റഷ്യൻ മിസൈൽ ആക്രമണത്തിൽ 12 സൈനികർ കൊല്ലപ്പെടുകയും നിരവധി പേർക്ക് പരുക്കേൽക്കുകയും ചെയ്‌തിരുന്നു. ഇതേ തുടർന്ന് മേഖലയുടെ ചുമതലയുള്ള സൈനിക കമാൻഡർ രാജി സമർപ്പിച്ചിരുന്നു.