നിയമവിരുദ്ധ മത്സ്യബന്ധനം; ബോട്ട് പിടികൂടി

മത്സ്യസമ്പത്തിന്റെ നാശത്തിനിടയാക്കുംവിധം നിയമവിരുദ്ധ മത്സ്യബന്ധനത്തിലേര്‍പ്പെട്ട ‘സനാതനം’ എന്ന ബോട്ട് ഫിഷറീസ് മറൈന്‍ എന്‍ഫോഴ്‌സ്മെന്റ് വിഭാഗം കസ്റ്റഡിയിലെടുത്തു. മറൈന്‍ എന്‍ഫോഴ്‌സ്മെന്റ് ഇന്‍സ്പെക്ടര്‍ ഓഫ് ഗാര്‍ഡ് പി ഷണ്‍മുഖന്റെ നേതൃത്വത്തില്‍ രാത്രികാല പട്രോളിങ് നടത്തവെ പുലര്‍ച്ചെ 3.10നാണ് കൊയിലാണ്ടി ഭാഗത്തുനിന്ന് ബോട്ട് പിടികൂടിയത്.

ഇതില്‍നിന്ന് പിടിച്ചെടുത്ത മത്സ്യം ലേലം ചെയ്യുകയും തുടര്‍നടപടികള്‍ക്കായി കോഴിക്കോട് ജില്ലാ ഫിഷറീസ് ഡെപ്യൂട്ടി ഡയറക്ടര്‍ക്ക് റിപ്പോര്‍ട്ട് കൈമാറുകയും ചെയ്തു. ബേപ്പൂര്‍ ഫിഷറീസ് അസി. ഡയറക്ടര്‍ സുനീറിന്റെ നിര്‍ദേശപ്രകാരം നടത്തിയ പരിശോധനയില്‍ ഫിഷറി ഗാര്‍ഡുമാരായ കെ ഹരിദാസന്‍, കെ അരുണ്‍, റെസ്‌ക്യൂ ഗാര്‍ഡുമാരായ താജുദ്ദീന്‍, വിനേഷ് എന്നിവരും ഉണ്ടായിരുന്നു.