ഗതാഗത മേഖലയിൽ നിർണായക പരീക്ഷണം നടത്തി ഖത്തർ

ദോഹ: ഗതാഗത മേഖലയിൽ നിർണായക ചുവടുവെപ്പിനൊരുങ്ങി ഖത്തർ. ഡ്രൈവറില്ലാ ടാക്‌സികൾ നിരത്തിൽ പരീക്ഷണ ഓട്ടം ആരംഭിച്ചു. കർവയുടെ ഓട്ടോണമസ് ഇലക്ട്രിക് ടാക്സികളാണ് ഇതിനായി എത്തിച്ചിരിക്കുന്നത്. ആദ്യ ഘട്ട പരീക്ഷണങ്ങൾക്കായി രാജ്യത്തെ തെരഞ്ഞെടുക്കപ്പെട്ട കേന്ദ്രങ്ങളിലാണ് ഈ വാഹനങ്ങൾ എത്തിച്ചിരിക്കുന്നത്.
രണ്ട് ഘട്ടമായാണ് പരീക്ഷണം. ആദ്യ ഘട്ടത്തിൽ വിദഗ്ധ സംഘത്തിന്റെ മേൽനോട്ടത്തിൽ യാത്രക്കാരില്ലാതെയാണ് പരീക്ഷണയോട്ടം നടക്കുന്നത്. രണ്ടാം ഘട്ടത്തിൽ ഡ്രൈവറില്ലാതെ യാത്രക്കാർ മാത്രമായി പൂർണ്ണതോതിലുള്ള പരീക്ഷണ ഓട്ടവും നടത്താനാണ് ഖത്തർ ഗതാഗത മന്ത്രാലയത്തിന്റെ തീരുമാനം.

ടൂറിസ്റ്റ്, സർവീസ് റൂട്ടുകൾ ഉൾപ്പെടുത്തിയാണ് പരീക്ഷണം. ഈ പരീക്ഷണങ്ങൾ അടുത്ത വർഷം ആദ്യ പാദംവരെ തുടരും. നേരത്തെ ഖത്തറിൽ നടന്ന ഓട്ടോണമസ് ബസിന്റെ പരീക്ഷണം വിജയകരമായിരുന്നു. ഇത് വിജയിച്ചതോടെയാണ് ഗതാഗത മന്ത്രാലയം ഡ്രൈവറില്ലാ ടാക്‌സികളുടെ പരീക്ഷണത്തിലേക്ക് കടന്നത്. പരീക്ഷണങ്ങൾക്ക് ഉപയോഗിക്കുന്ന എല്ലാ ടാക്‌സികളിലും സുരക്ഷ ഉറപ്പാക്കാൻ ആറ് ലോംഗ്-മിഡ് റേഞ്ച് ക്യാമറകൾ, നാല് റഡാറുകൾ, നാല് ലിഡാർ യൂണിറ്റുകൾ എന്നിവ സജ്ജീകരിച്ചിട്ടുണ്ട്.

ഇത് പരീക്ഷണയോട്ടങ്ങളിൽ നാവിഗേഷൻ നിയന്ത്രണം സാധ്യമാക്കുകയും യാത്രക്കാരുടെ സുരക്ഷ ഉറപ്പാക്കുകയും ചെയ്യും. ഖത്തറിന്റെ വിശാലമായ ഭാവി സ്മാർട്ട് മൊബിലിറ്റി സംരംഭങ്ങളുടെ ഭാഗമായ ഓട്ടോണമസ് ടാക്‌സി സർവീസ് നടത്തുന്നതിനുള്ള നിയന്ത്രണ ചട്ടക്കൂടുകൾ സ്ഥാപിക്കുന്നതിനും ആവശ്യമായ അടിസ്ഥാന സൗകര്യങ്ങൾ തയ്യാറാക്കുന്നതിനും പുറമെ, സാങ്കേതികവിദ്യയുടെ കാര്യക്ഷമത വിലയിരുത്തുകയുമാണ് ഈ പരീക്ഷണങ്ങളുടെ പ്രധാന ലക്ഷ്യം.