കൊല്ലത്തെ ഉത്സവം വീണ്ടും വിവാ​​ദത്തിൽ

കൊല്ലം: ദേവസ്വം ബോർഡ് ക്ഷേത്രത്തിൽ ആർ.എസ്.എസിന്റെ ഗണഗീതം പാടിയത് വിവാദമാകുന്നു. കോട്ടുക്കൽ മഞ്ഞിപ്പുഴ ശ്രീഭഗവതി ഭദ്രകാളി ക്ഷേത്രത്തിലെ ​ഗാനമേളയ്ക്കിടെയാണ് ആർ.എസ്.എസിന്റെ ഗണഗീതം പാടിയത്. തിരുവിതാംകൂർ ദേവസ്വംബോർഡിന് കീഴിലുള്ള ക്ഷേത്രത്തിലാണ് ആർ.എസ്.എസിന്റെ ഗണഗീതം പാടിയത്. സംഭവത്തിൽ കോട്ടുക്കൽ സ്വദേശി പ്രതിൻ പൊലീസിൽ പരാതി നൽകി. ക്ഷേത്ര പരിസരത്ത് ആർ.എസ്.എസിന്റെ കൊടിതോരണങ്ങൾ കെട്ടിയതിന്റെ പേരിൽ മറ്റൊരു പരാതിയും പൊലീസിന് മുന്നിലുണ്ട്. ക്ഷേത്രോപദേശക സമിതി വൈസ് പ്രസിഡന്റ് അഖിൽ ശശിയാണ് ഈ പരാതി നൽകിയിരിക്കുന്നത്.

ഇന്നലെയാണ് ക്ഷേത്രത്തിൽ ​ഗാനമേള നടന്നത്. ക്ഷേത്രത്തിലെ ഉത്സവത്തോട് അനുബന്ധിച്ചാണ് പരിപാടി സംഘടിപ്പിച്ചിരുന്നത്. നാഗർകോവിൽ ബേർഡ്സ് എന്ന ഗാനമേള ട്രൂപ്പാണ് പരിപാടി അവതരിപ്പിച്ചത്. കോട്ടുക്കലിലെ ടീം ഛത്രപതി എന്ന സംഘമാണ് ഗാനമേള സ്പോൺസർ ചെയ്തത്. ആളുകളുടെ ആവശ്യപ്രകാരമാണ് ഗണഗീതം പാടിയതെന്നാണ് ഗാനമേള ട്രൂപ്പിലെ അംഗങ്ങളുടെ വിശദീകരണം. ​

ഗാനമേള ബുക്ക് ചെയ്ത ടീം ഛത്രപതി നേരത്തെ തന്നെ ഈപാട്ട് പാടണമെന്ന് നിർദ്ദേശിച്ചിരുന്നതായും ഗാനമേള ട്രൂപ്പ് അധികൃതർ പറയുന്നു. ആർ.എസ്.എസുമായി ബന്ധപ്പെട്ട രണ്ടു പാട്ട് പാടണമെന്നായിരുന്നു ആവശ്യപ്പെട്ടത്. എന്നാൽ അതിലൊന്ന് തങ്ങൾക്ക് അറിയില്ലെന്ന് മറുപടി നൽകിയിരുന്നു. കടയ്ക്കൽ ക്ഷേത്രത്തിൽ ഉത്സവപരിപാടിയിൽ വിപ്ലവ ഗാനം പാടിയതിനെ തുടർന്നുള്ള വിവാദത്തിന്റെ അലയൊലികൾ അടങ്ങുംമുമ്പാണ് കൊല്ലത്ത് വീണ്ടും ഗാനമേളയെ ചൊല്ലി വിവാദം ഉയരുന്നത്.