മലയാള സിനിമാ ചരിത്രത്തിലെ ഏറ്റവും ജനപ്രീതിയാർജിച്ച ക്രൈം ത്രില്ലർ ഫ്രാഞ്ചൈസിയുടെ മൂന്നാം ഭാഗമായ ‘ദൃശ്യം 3’ തിയേറ്ററുകളിൽ വലിയ വിജയമാണ് സ്വന്തമാക്കിയത്. റിലീസ് ചെയ്ത് വെറും 58 മണിക്കൂറുകൾക്കുള്ളിൽ തന്നെ ചിത്രം 100 കോടി ക്ലബ്ബിൽ ഇടംനേടിയിരുന്നു. തിയേറ്ററുകളിലെ ചരിത്ര വിജയത്തിന് പിന്നാലെ ഒടിടി സ്ട്രീമിങ്ങും ആരംഭിച്ച ചിത്രം, ബോക്സ് ഓഫീസിൽ നിന്ന് വൻ തുകയാണ് വാരിക്കൂട്ടിയത്.
മഴവിൽ മനോരമയുടെ അവാർഡ് നിശയിലാണ് ചിത്രത്തിന്റെ നാലാം ഭാഗം ഉണ്ടാകുമെന്ന ഔദ്യോഗിക പ്രഖ്യാപനം നിർമാതാവ് ആന്റണി പെരുമ്പാവൂർ നടത്തിയത്. ദൃശ്യത്തിന് ഉറപ്പായും നാലാം ഭാഗം വരുമെന്നും ഇത് തന്റെ മനസ്സിൽ നിന്ന് പറയുന്നതാണെന്നും അദ്ദേഹം വ്യക്തമാക്കി. മോഹൻലാൽ – ജീത്തു ജോസഫ് കൂട്ടുകെട്ടിൽ പിറന്ന ഈ ഫ്രാഞ്ചൈസിക്ക് സിനിമാലോകത്ത് വലിയ ആരാധകവൃന്ദമാണുള്ളത്.
ആഗോള ബോക്സ് ഓഫീസിൽ നിന്ന് ആകെ 237.70 കോടി രൂപയാണ് ദൃശ്യം 3 നേടിയത്. ഇതിൽ കേരളത്തിൽ നിന്ന് മാത്രം 90.21 കോടിയും, മറ്റ് ഇന്ത്യൻ സംസ്ഥാനങ്ങളിൽ നിന്ന് 37 കോടിയോളവും ചിത്രം സ്വന്തമാക്കി. മോഹൻലാൽ ചിത്രങ്ങൾക്ക് വലിയ വിപണിയുള്ള വിദേശ രാജ്യങ്ങളിൽ നിന്ന് മാത്രം 109 കോടി രൂപയാണ് ചിത്രം വാരിക്കൂട്ടിയത്. പശ്ചിമേഷ്യ, നോർത്ത് അമേരിക്ക, ബ്രിട്ടൻ, അയർലൻഡ്, ഓസ്ട്രേലിയ, ന്യൂസിലൻഡ് തുടങ്ങിയ വിദേശ വിപണികളിലും ചിത്രം മികച്ച പ്രകടനം കാഴ്ചവച്ചു.
മലയാളം സിനിമയ്ക്ക് വലിയൊരു ബെഞ്ച്മാർക്ക് നൽകിയ ദൃശ്യം പരമ്പരയിലെ ആദ്യ രണ്ടു ഭാഗങ്ങൾ പോലെ തന്നെ മൂന്നാം ഭാഗവും പ്രേക്ഷകർ ഇരുകൈയും നീട്ടിയാണ് സ്വീകരിച്ചത്. ജോർജ്കുട്ടിയുടെയും കുടുംബത്തിന്റെയും അതിജീവനത്തിന്റെ കഥ പറയുന്ന ഈ ചിത്രം ഇന്ത്യയിലും പുറത്തുമുള്ള വിവിധ ഭാഷകളിലേക്ക് റീമേക്ക് ചെയ്യപ്പെട്ട് ലോകശ്രദ്ധ ആകർഷിച്ച ഒന്നുകൂടിയാണ്.