Home » Blog » Kerala » മയിൽപ്പീലി സ്കോളർഷിപ്പ് വിവാദത്തിൽ പുതിയ വഴിത്തിരിവ്; പരീക്ഷയ്ക്ക് അനുമതി നൽകി ഹൈക്കോടതി, ഫലം തടഞ്ഞുവെച്ചു
highcourt--680x450

കേരളത്തിലെ സ്കൂളുകളിൽ ബാലഗോകുലത്തിന്റെ പ്രസിദ്ധീകരണമായ ‘മയിൽപ്പീലി’ മാസികയുടെ ആഭിമുഖ്യത്തിൽ നടത്തുന്ന ‘യങ് സ്കോളർ എക്സാം’ നിശ്ചയിച്ച തീയതിയിൽ നടത്താൻ ഹൈക്കോടതി അനുമതി നൽകി. പരീക്ഷ നടത്തരുതെന്ന സർക്കാർ നിലപാടിനെ ചോദ്യം ചെയ്ത് അധ്യാപക സംഘടനയായ എൻ.ടി.യു സമർപ്പിച്ച ഹർജിയിലാണ് ഹൈക്കോടതി സിംഗിൾ ബെഞ്ചിന്റെ ഇടക്കാല ഉത്തരവ്. പരീക്ഷ നടത്താമെങ്കിലും ഫലം പ്രസിദ്ധീകരിക്കരുതെന്ന് കോടതി കർശനമായി നിർദ്ദേശിച്ചിട്ടുണ്ട്.

 

മത-രാഷ്ട്രീയ സംഘടനകൾക്ക് സ്കൂളുകളിൽ ഇത്തരം പരീക്ഷകൾ നടത്താൻ അനുമതി നൽകാനാവില്ലെന്ന നിലപാടാണ് സർക്കാർ കോടതിയിൽ സ്വീകരിച്ചത്. എന്നാൽ, പരീക്ഷ നടത്താൻ നേരത്തെ അനുമതി നൽകിയിരുന്നതായും പിന്നീട് യാതൊരു കാരണവും വ്യക്തമാക്കാതെയും നോട്ടീസ് നൽകാതെയും അനുമതി റദ്ദാക്കുകയായിരുന്നുവെന്നും ഹർജിക്കാർ വാദിച്ചു. നേരത്തെ നിശ്ചയിച്ച പരീക്ഷയുടെ കാര്യത്തിൽ എന്ത് തീരുമാനമെടുക്കുമെന്ന് കോടതി സർക്കാരിനോട് ചോദിച്ചു. മുൻപ് അനുമതി നൽകിയത് ഉദ്യോഗസ്ഥന് സംഭവിച്ച പിഴവാണെന്നായിരുന്നു സർക്കാരിന്റെ വിശദീകരണം.

 

ഫലം പ്രഖ്യാപിക്കുന്നതിന് പുറമെ, പരീക്ഷ വ്യാപിപ്പിക്കാനോ മറ്റ് പരീക്ഷകൾ സംഘടിപ്പിക്കാനോ പാടില്ലെന്നും സംഘാടകർക്ക് കോടതി വിലക്കേർപ്പെടുത്തിയിട്ടുണ്ട്. ഇടക്കാല ഉത്തരവായതിനാൽ വിഷയത്തിൽ രണ്ടാഴ്ചയ്ക്ക് ശേഷം ഹൈക്കോടതി വിശദമായ വാദം കേൾക്കും. പരീക്ഷയ്ക്ക് അനുമതി നൽകിയതിലൂടെ ഈ ഘട്ടത്തിൽ സർക്കാരിന് തിരിച്ചടിയാണ് നേരിട്ടിരിക്കുന്നത്.

Leave a Reply

Your email address will not be published. Required fields are marked *