സ്കൂൾ വിദ്യാർത്ഥികളെ മുന്നിലിരുത്തി ​ഗ്ലാസ്സുകളിൽ മ​ദ്യം പകർന്നു; വെള്ളമൊഴിച്ച് കുട്ടികളോട് കുടിക്കാൻ ആവശ്യപ്പെടുന്ന വീഡിയോ വൈറൽ

ഭോപ്പാൽ: സ്കൂൾ വിദ്യാർത്ഥികൾക്ക് മദ്യം ഒഴിച്ചു നൽകി അധ്യാപകൻ. ​ഗ്ലാസിൽ മദ്യമൊഴിച്ച് വെള്ളം ചേർത്ത് കുടിക്കാൻ ആവശ്യപ്പെടുന്ന അധ്യാപക​ന്റെ വീഡിയോ സോഷ്യൽ മീഡിയയിൽ പ്രചരിച്ചതിനു പിന്നാലെ അധ്യാപകനെതിരെ നടപടി. സർക്കാർ സ്കൂൾ അധ്യാപകനെ സസ്പെന്റ് ചെയ്യാൻ ആവശ്യപ്പെട്ട് ജില്ലാ കളക്ടർ. മധ്യപ്രദേശിലെ കാറ്റ്നി ജില്ലയിലെ ഖിർഹാനി ഗ്രാമത്തിലെ സർക്കാർ പ്രൈമറി സ്കൂളിലെ അധ്യാപകനായ ലാൽ നവീൻ പ്രതാപ് സിംഗിനെ സസ്പെ​ന്റ് ചെയ്ത് ജില്ലാ വിദ്യാഭ്യാസ ഓഫീസർ.

കഴിഞ്ഞ വെള്ളിയാഴ്ച മുതലാണ് സോഷ്യൽ മീഡിയയിൽ വീഡിയോ പ്രചരിച്ചത്. ഇത് ശ്രദ്ധയിൽപ്പെട്ട ജില്ലാ കളക്ടർ ദിലീപ് കുമാർ യാദവ് അധ്യാപകനെതിരെ നടപടിയെടുക്കാൻ ജില്ലാ വിദ്യാഭ്യാസ ഓഫീസറോട് ആവശ്യപ്പെടുകയായിരുന്നു. ഒരു മുറിയിൽ നിന്നുള്ള വീഡിയോയിൽ ആൺകുട്ടികളെ മുന്നിലിരുത്തി, കപ്പുകളിൽ മദ്യമൊഴിക്കുന്നത് കാണാം, ശേഷം കുടിക്കുന്നതിന് മുമ്പ് വെള്ളം കലർത്തണമെന്നും കുട്ടികളോട് അധ്യാപകൻ പറയുന്നതും കേൾക്കാം. സമൂഹമാധ്യമങ്ങളിൽ പ്രചരിച്ച വീഡിയോക്കെതിരെ വലിയ വിമർശനം ഇതിനോടകം ഉയർന്നിട്ടുണ്ട്.