വിഴിഞ്ഞത്ത് വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം രാമേശ്വരത്തു നിന്ന് കണ്ടെത്തി

തിരുവനന്തപുരം: വിഴിഞ്ഞത്ത് വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. ഇന്ന് രാവിലെയാണ് തമിഴ്നാട്ടിലെ രാമേശ്വരത്തു നിന്ന് സ്റ്റെല്ലസ് ഇരയമ്മൻ എന്നയാളുടെ മൃതദേഹം കണ്ടെത്തിയത്. കഴിഞ്ഞ മാസം 30ന് വിഴിഞ്ഞത്തു നിന്ന് പോയ വള്ളംമറിഞ്ഞാണ് അപകടം ഉണ്ടായത്. കടൽ ക്ഷോഭമുണ്ടായിരുന്ന ഘട്ടത്തിലാണ് മത്സ്യബന്ധന വള്ളം മറിഞ്ഞ് തൊഴിലാളികളെ കാണാതായത്.

അഞ്ച് പേരായിരുന്നു ഈ മത്സ്യബന്ധന വള്ളത്തിൽ ഉണ്ടായിരുന്നത്. ഇതിൽ രണ്ട് പേർ കടലിൽ പോകുകയും ബാക്കി മൂന്ന് പേർ നീന്തി രക്ഷപ്പെടുകയുമായിരുന്നു. അതിൽ ഒരാളുടെ മൃതദേഹം പൂവാർ ഭാഗത്ത് നിന്ന് കണ്ടെത്തിയിരുന്നു. എന്നാൽ സ്റ്റെല്ലസ് ഇരയമ്മനായി തിരച്ചിൽ നടത്തിയിരുന്നുവെങ്കിലും കണ്ടെത്താൻ സാധിച്ചിരുന്നില്ല.