പിഞ്ചുകുഞ്ഞിനെ സാഹസികമായി രക്ഷിച്ച യുവതി

ബറേലി: പിഞ്ചുകുഞ്ഞിനെ സാഹസികമായി രക്ഷിച്ച യുവതിയാണ് ഇപ്പോൾ സൈബർ ലോകത്ത് കയ്യടി നേടുന്നത്. നടി ദിഷ പഠാണിയുടെ സഹോദരി ഖുഷ്ബു പഠാണിയാണ് വീടിന് സമീപം തകർന്നുകിടന്ന വീടിനുള്ളിൽ ആരോ ഉപേക്ഷിച്ചുപോയ കുഞ്ഞിനെ രക്ഷിച്ചത്. പത്ത് മാസം മാത്രം പ്രായമുള്ള കുഞ്ഞിനെയാണ് യുവതി രക്ഷപെടുത്തിയത്. മതിൽ സാഹസികമായി ചാടിക്കടന്നാണ് ഖുഷ്ബു പഠാണി തകർന്ന കെട്ടിടത്തിനുള്ളിൽ പ്രവേശിച്ചത്. ദിഷയുടെ ബറേലിയിലെ വസതിക്ക് സമീപമുള്ള കെട്ടിടത്തിലാണ് കുഞ്ഞിനെ കണ്ടെത്തിയത്. ഖുഷ്ബു പിതാവും വിരമിച്ച പൊലീസ് ഓഫീസറുമായ ജഗദീഷ് പഠാനിക്കൊപ്പമാണ് താമസിക്കുന്നത്. ഖുഷ്ബു പ്രഭാത നടത്തത്തിന് പുറത്തിറങ്ങിയപ്പോൾ അടുത്തുള്ള കെട്ടിടത്തിൽ നിന്ന് കുഞ്ഞിൻറെ കരച്ചിൽ കേൾക്കുകയായിരുന്നു. പക്ഷേ നേരിട്ട് കെട്ടിടത്തിനുള്ളിൽ പ്രവേശിക്കാനാവില്ല. അതിനാൽ ഖുഷ്ബു മതിൽ ചാടിക്കടന്ന് കെട്ടിടത്തിനുള്ളിൽ പ്രവേശിച്ചു. മുഖത്ത് പരിക്കേറ്റ പിഞ്ചുകുഞ്ഞിനെയാണ് അവിടെ നിലത്തു കിടക്കുന്ന നിലയിൽ കണ്ടത്. ഉടൻ തന്നെ കുഞ്ഞിനെ വീട്ടിലേക്ക് കൊണ്ടുവന്ന് പ്രഥമ ശുശ്രൂഷ നൽകി. അപ്പോഴേക്കും അറിയിച്ചതനുസരിച്ച് പൊലീസ് സ്ഥലത്തെത്തിയെന്ന് സർക്കിൾ ഓഫീസർ പങ്കജ് ശ്രീവാസ്തവ പറഞ്ഞു. പ്രാഥമിക ചികിത്സകൾ നൽകിയ ശേഷം കുഞ്ഞിനെ ജില്ലാ ആശുപത്രിയിലേക്ക് മാറ്റി. ജില്ലാ ആശുപത്രിയിൽ കുഞ്ഞിന്റെ ചികിത്സ തുടരുകയാണെന്ന് പൊലീസ് പറഞ്ഞു. കുട്ടിയെ ആരാണ് ഉപേക്ഷിച്ചതെന്ന് ഇനിയും വ്യക്തമായിട്ടില്ല. ഇവരെ തിരിച്ചറിയാൻ സമീപത്തുള്ള സിസിടിവി ദൃശ്യങ്ങൾ പൊലീസ് പരിശോധിച്ചു വരികയാണ്. കുഞ്ഞിനെ ഈ അവസ്ഥയിൽ ഉപേക്ഷിച്ചത് ആരെന്ന് കണ്ടെത്തുമെന്ന് പങ്കജ് ശ്രീവാസ്തവ പറഞ്ഞു.