ചാറ്റ് ജി.പി.ടി പ്ലസ് സൗജന്യമായി ഉപയോഗിക്കാം; ആനുകൂല്യം മേയ് അവസാനം വരെ

അടുത്ത ഏതാനും ആഴ്ചകൾക്കുള്ളിൽ തിരഞ്ഞെടുത്ത ഉപയോക്താക്കൾക്ക് ചാറ്റ് ജി.പി.ടി പ്ലസ് സൗജന്യമായി ലഭ്യമാകുമെന്ന് ഓപ്പൺ എ.ഐ അറിയിച്ചു. ഓപ്പൺ എ.ഐ ചാറ്റ് ജി.പി.ടി പ്ലസ് സബ്സ്ക്രിപ്ഷൻ നിരക്കനുസരിച്ച് പ്രതിമാസം 20 ഡോളർ (ഏകദേശം 1,700 രൂപ) ചെലവാകും. ആ സാഹചര്യത്തിലാണ് ഓപ്പൺ എ.ഐയുടെ ഈ തീരുമാനം. ആഴത്തിലുള്ള ഗവേഷണ, മൾട്ടിപ്പിൾ റീസണിങ് മോഡലുകളിലേക്കും സോറ വീഡിയോ ജനറേഷനിലേക്കുമുള്ള പരിമിതമായി പ്രവേശനം ലഭിക്കുന്നതിന് പണം നൽകേണ്ടതില്ല. കൂടാതെ ഏറ്റവും കുറഞ്ഞ സബ്സ്ക്രിപ്ഷൻ പ്ലാനിൽ ഉൾപ്പെട്ട ഫയൽ അപ്‌ലോഡുകൾ, ഇമേജ് ജനറേഷൻ എന്നിവയിലെ പരിധികൾ ഉയർത്തുമെന്ന് ഓപ്പൺ എ.ഐ പറഞ്ഞു.

മേയ് മാസം അവസാനം വരെ വിദ്യാർഥികൾക്ക് സൗജന്യമായി ചാറ്റ് ജി.പി.ടി പ്ലസ് നൽകുമെന്ന് ഓപ്പൺ എ.ഐ സി.ഇ.ഒ സാം ആൾട്ട്മാൻ എക്സിലൂടെ പ്രഖ്യാപിച്ചു. തുടക്കത്തിൽ അമേരിക്ക, കാനഡ എന്നിവിടങ്ങളിലെ വിദ്യാർഥികൾക്കാണ് ഈ അവസരം ലഭിക്കുക. ഇത് പണമടച്ചുള്ള സബ്സ്ക്രിപ്ഷൻ പ്ലാനിന്റെ പ്രൊമോഷന്റെ ഭാഗമാണെന്നും ഇതുമായി ബന്ധപ്പെട്ട വിശദാംശങ്ങൾ കമ്പനിയുടെ വെബ്‌സൈറ്റിൽ ലഭ്യമാണെന്നും സാം കൂട്ടിച്ചേർത്തു. സൗജന്യ സബ്സ്ക്രിപ്ഷനിലേക്ക് ആക്‌സസ് ക്ലെയിം ചെയ്യുന്നതിന് മുമ്പ്, വിദ്യാർഥികളുടെ ‘ഷീർ ഐ.ഡി’ സ്റ്റാറ്റസ് പരിശോധിക്കണമെന്ന് ഓപ്പൺ എ.ഐ പറഞ്ഞു.

Also Read: ഭൂമിയിൽ നിന്ന് നക്ഷത്രങ്ങളിലേക്ക് ഒരു ചരട്! ബഹിരാകാശ എലിവേറ്റർ യാഥാർത്ഥ്യമാകുന്നുവോ?

ചാറ്റ് ജി.പി.ടിയുടെ സൗജന്യ പതിപ്പ് ഇതിനോടകം തന്നെ ചാറ്റ് ജി.പി.ടി – 4ഒ സീരീസിലേക്കും പ്രവേശനം വാഗ്‌ദാനം ചെയ്യുന്നു. കൂടാതെ ഒ3 മോഡലിലേക്കും പരിമിതമായി പ്രവേശനം നൽകുന്നുണ്ട്. അതേസമയം പ്ലസ് സബ്സ്ക്രിപ്ഷൻ ആഴത്തിലുള്ള ഗവേഷണത്തിലേക്കും ഒന്നിലധികം യുക്തിസഹമായ മോഡലുകളിലേക്കും പ്രവേശനം വാഗ്‌ദാനം ചെയ്യുന്നു. ഇതിൽ ഒ1, ഒ3 മിനി, ഒ3 മിനി – ഹൈ എന്നിവ ഉൾപ്പെടുന്നു. പണമടച്ചവർക്ക് ഫെബ്രുവരിയിൽ പ്രഖ്യാപിച്ച ജി.പി.ടി 4.5 മോഡലിലേക്കുള്ള പ്രവേശനവും വാഗ്‌ദാനം ചെയ്യുന്നുണ്ട് ഓപ്പൺ എ.ഐ.