വിജിലൻസ് ക്ലിയറൻസ് വൈകുന്നതിൽ പ്രമേയം പാസാക്കമെന്ന യോഗേഷ് ഗുപ്തയുടെ ആവശ്യം തള്ളി ഐപിഎസ് അസോസിയേഷൻ

തിരുവനന്തപുരം: വിജിലൻസ് ക്ലിയറൻസ് വൈകുന്നതിൽ പ്രമേയം പാസാക്കമെന്ന യോഗേഷ് ഗുപ്തയുടെ ആവശ്യം തള്ളി ഐപിഎസ് അസോസിയേഷൻ. വ്യക്തിഗത കാര്യങ്ങളിൽ പ്രമേയം പാസാക്കേണ്ടതില്ലെന്ന് അസോസിയേഷൻ വ്യക്തമാക്കി. അസോസിയേഷൻ പ്രസിഡന്‍റാണ് യോഗേഷ്. സർക്കാറിന് അനഭിമതനായ യോഗേഷിന് വിജിലൻസ് സർട്ടിഫിക്കറ്റ് ഇതേ വരെ നൽകിയിട്ടില്ല. മുഖ്യമന്ത്രിയെ നേരിട്ട് കാണാനും അനുമതി നൽകിയില്ല.

സംസ്ഥാന പൊലീസ് മേധാവി സ്ഥാനത്തേക്ക് പരിഗണിക്കാൻ സംസ്ഥാനം കേന്ദ്രത്തിന് അയച്ച പട്ടികയിൽ യോഗേഷിന്‍റെ പേരുമുണ്ട്. ചില ഫയൽ കൈമാറ്റവുമായി ബന്ധപ്പെട്ട് പിന്നീടാണ് യോഗേഷ് സർക്കാരിന് അനഭിമതനാകുന്നത്. മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറിയായിരുന്ന കെ എം എബ്രഹാമിന്‍റെ അനധികൃത സ്വത്ത് സമ്പാദന കേസുമായി ബന്ധപ്പെട്ട് വിജലൻസ് ഫയലുകള്‍ സിബിഐക്ക് കൈമാറിയതോടെയാണ്, യോഗേഷ് ഗുപ്ത സംസ്ഥാന സര്‍ക്കാരിന് അനഭിമതനായത്. സർക്കാരുമായി ആലോചിക്കാതെ ഫയൽ കൈമാറി എന്നതാണ് കാരണം.