നടൻ ടൊവിനോ തോമസിൻ്റെ ഷെഫ് ബൈക്കപകടത്തിൽ മരിച്ചു

നടൻ ടൊവിനോ തോമസിൻ്റെ ഷെഫ് ബൈക്കപകടത്തിൽ മരിച്ചു. ഏറ്റുമാനൂർ മണർകാട് ബൈപ്പാസിലാണ് അപകടം. കല്ലറ തെക്കേ ഈട്ടിത്തറയിൽ വിഷ്ണു ശിവാനന്ദനാണ് (31) മരിച്ചത്. ഗുരുതരമായി പരിക്കേറ്റ രണ്ടുപേരെ ആശുപത്രിയിൽ പ്രവേശിപ്പിച്ചു.തിങ്കളാഴ്ച രാവിലെ പട്ടിത്താനം-മണർകാട് ബൈപ്പാസിൽ ചെറുവാണ്ടൂർ കെഎൻബി ഓഡിറ്റോറിയത്തിന് സമീപമായിരുന്നു അപകടം. പേരൂരിലെ ബന്ധുവിനെ സന്ദർശിച്ച് മടങ്ങുന്നതിനിടെയാണ് വിഷ്ണു അപകടത്തിൽപ്പെട്ടത്. പോലീസും നാട്ടുകാരും ചേർന്നാണ് അപകടത്തിൽപ്പെട്ടവരെ ആശുപത്രിയിലെത്തിച്ചത്.

മറ്റൊരു ബൈക്കിലുണ്ടായിരുന്ന പേരൂർ സ്വദേശികളായ മാത്യൂസ് റോജി, ജസ്റ്റിൻ മാത്യു എന്നിവർ ഗുരുതര പരുക്കുകളോടെ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ്. വിഷ്ണുവിനെ തെള്ളകത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പാരലൽ കോളേജ് അധ്യാപകനായിരുന്ന രാജിയുടെയും പരേതനായ ശിവാനന്ദൻ്റെയും മകനാണ് വിഷ്ണു.