കേരളത്തിലെ ദത്തെടുക്കൽ പ്രക്രിയ: നീണ്ട കാത്തിരിപ്പ് ദമ്പതികളെ നിരാശരാക്കുന്നുതായി റിപ്പോർട്ട്

സംസ്ഥാനത്ത് ദത്തെടുക്കാൻ കുട്ടികളുടെ എണ്ണം ഓരോ വർഷവും കുറഞ്ഞുവരികയാണ്. അതേസമയം, സെൻട്രൽ അഡോപ്ഷൻ റിസോഴ്സ് ഏജൻസി വഴി കുട്ടികളെ നിയമപരമായി ദത്തെടുക്കാൻ രജിസ്റ്റർ ചെയ്ത ദമ്പതികളുടെ എണ്ണം വർദ്ധിച്ചു.

2001ൽ സംസ്ഥാനത്ത് 297 കുട്ടികളെ ദത്തെടുത്തു. ഇത് 2013-14ൽ 199 ആയും 2022-23ൽ 108 ആയും കുറഞ്ഞു. കഴിഞ്ഞ പത്ത് വർഷത്തിനിടെ 1428 കുട്ടികളെയാണ് സംസ്ഥാനത്ത് ദത്തെടുത്തത്. ഇതിൽ 130 എണ്ണവും വിദേശത്ത് താമസിക്കുന്ന ദമ്പതികളുടേതാണ്. നിലവിൽ കേരളത്തിൽ 1158 ദമ്പതികൾ നിയമപരമായി ദത്തെടുക്കാൻ അപേക്ഷിച്ചിട്ടുണ്ട്. അതേസമയം, സംസ്ഥാനത്തെ 14 ജില്ലകളിലെ അംഗീകൃത സ്ഥാപനങ്ങളിൽ ആകെ 166 കുട്ടികളാണ് ദത്തെടുക്കാൻ കാത്തിരിക്കുന്നത്.

ദത്തെടുക്കാൻ അർഹതയുള്ള കുട്ടികളുടെ കുറവുണ്ടെന്നാണ് അധികൃതരുടെ വാദം. ഉപേക്ഷിക്കപ്പെട്ട കുട്ടികളെയും അവരുടെ മാതാപിതാക്കളോ ബന്ധുക്കളോ ഉപേക്ഷിച്ച കുട്ടികളെയും നിയമനടപടികൾക്ക് ശേഷം ദത്തെടുക്കാം. ഇത്തരത്തില് ഉപേക്ഷിക്കപ്പെട്ട് ശിശുസംരക്ഷണ കേന്ദ്രങ്ങളില് കഴിയുന്ന നൂറുകണക്കിന് കുട്ടികളുണ്ട്.

ആവശ്യമായ നിയമനടപടികൾ പൂർത്തീകരിക്കുന്നതിലും കുട്ടികളെ അനാഥരായി പ്രഖ്യാപിക്കുന്നതിലും അധികൃതരുടെ ഭാഗത്തുനിന്ന് വീഴ്ചയുണ്ടെന്ന് ദമ്പതികൾ പറയുന്നു.