ഇംഗ്ലണ്ട് പര്യടനത്തില്‍ നായകനാക്കേണ്ടത് ആ സീനിയർ താരത്തെ: ആര്‍ അശ്വിന്‍

അടുത്തമാസം നടക്കാനിരിക്കുന്ന ഇന്ത്യൻ ടീമിന്‍റെ ഇംഗ്ലണ്ട് പര്യടനത്തില്‍ ശുഭ്മാൻ ഗിൽ ഇന്ത്യൻ ക്യാപ്റ്റനാവുമെന്നാണ് പ്രതീക്ഷിക്കപ്പെടുന്നത്. എന്നാല്‍ ഗില്‍ അല്ല ടീമിലെ സീനിയര്‍ താരമായ ജസ്പ്രീത് ബുമ്രയെയാണ് അടുത്ത നായകനായി പരിഗണിക്കേണ്ടതെന്ന് വെളിപ്പെടുത്തിയിരിക്കുകയാണ് ആര്‍ അശ്വിന്‍.

വിരാട് കോഹ്‌ലിയും രോഹിത് ശര്‍മയും ടെസ്റ്റ് ക്രിക്കറ്റില്‍ നിന്ന് വിരമിച്ചതോടെ ഇന്ത്യൻ ക്രിക്കറ്റില്‍ ഇനി ഗൗതം ഗംഭീര്‍ യുഗമായിരിക്കുമെന്നും അശ്വിന്‍ പറഞ്ഞു. ടെസ്റ്റ് പരമ്പരക്കായി ഇംഗ്ലണ്ടിലേക്ക് പോകുന്ന ഇന്ത്യൻ ടീം പൂര്‍ണമായും പുതിയൊരു ടീമായിരിക്കും.

ജസ്പ്രീത് ബുമ്രയായിരിക്കും ഈ ടീമിലെ ഏറ്റവും സീനിയര്‍ താരം. സ്വാഭാവികമായി ഇന്ത്യയുടെ അടുത്ത ക്യാപ്റ്റനായി തെരഞ്ഞെടുക്കേണ്ടതും ജസ്പ്രീത് ബുമ്രയെ തന്നെയാണ്. ബുമ്ര ക്യാപ്റ്റന്‍ സ്ഥാനം അര്‍ഹിക്കുന്നുമുണ്ട്. എന്നാല്‍ ബുമ്രയുടെ ഫിറ്റ്നെസ് കൂടി കണക്കിലെടുത്താവും സെലക്ടര്‍മാര്‍ ഇക്കാര്യത്തില്‍ അന്തിമ തീരുമാനമെടുക്കുക എന്നാണ് മനസിലാവുന്നതെന്നും അശ്വിന്‍ പറഞ്ഞു.

അതേസമയം കഴിഞ്ഞ ആഴ്ചയാണ് ഇന്ത്യൻ ക്യാപ്റ്റനായിരുന്ന രോഹിത് ശര്‍മ ടെസ്റ്റ് ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചത്. ഇന്നലെ ടീമിലെ സീനിയര്‍ താരവും മുന്‍ ക്യാപ്റ്റനുമായ വിരാട് കോഹ്‌ലിയും ടെസ്റ്റ് ക്രിക്കറ്റില്‍ നിന്ന് അപ്രതീക്ഷിതമായി വിരമിക്കല്‍ പ്രഖ്യപിച്ചിരുന്നു. ഇംഗ്ലണ്ട് പര്യടനത്തില്‍ കൂടി ടീമില്‍ തുടരാന്‍ കോഹ്‌ലിയില്‍ ബിസിസിഐ സമ്മര്‍ദ്ദം ചെലുത്തിയെങ്കിലും താരം വഴങ്ങിയില്ലെന്നായിരുന്നു റിപ്പോര്‍ട്ടുകള്‍. കഴിഞ്ഞ ഓസ്ട്രേലിയന്‍ പര്യടനത്തിനിടെ ആര്‍ അശ്വിനും രാജ്യാന്തര ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചിരുന്നു.