ഇടുക്കിയിൽ ഒരു കുടുംബത്തിലെ നാല് പേർ പൊള്ളലേറ്റു മരിച്ചു; വീട് പൂർണമായും കത്തിനശിച്ചു

ഇടുക്കി: പണിക്കൻകുടി കൊമ്പൊടിഞ്ഞാലിൽ വീടിന് തീ പിടിച്ച് നാല് പേർ മരിച്ചു. തെള്ളിപടവിൽ പരേതനായ അനീഷിന്റെ ഭാര്യ ശുഭ, മക്കളായ അഭിനന്ദ് (9), അഭിനവ് (5), ശുഭയുടെ അമ്മ പൊന്നമ്മ (75) എന്നിവരാണ് വീട്ടിലുണ്ടായിരുന്നത്. ഇതിൽ അഭിനവിൻ്റെ മൃതദേഹം മാത്രമാണ് തിരിച്ചറിഞ്ഞത്. ജനവാസംകുറവുള്ള പ്രദേശത്ത് ആയിരുന്നു വീട്. സംഭവത്തിൽ വീട് പൂർണ്ണമായി കത്തി നശിച്ച നിലയിലാണ്.

ഒരു മൃതദേഹം വീടിൻറെ അടുക്കള ഭാഗത്ത് നിന്നാണ് കണ്ടെത്തിയത്. നാട്ടുകാരാണ് വിവരം പോലീസിനെ അറിയിച്ചത്. അപകടം ഉണ്ടായത് എങ്ങനെയെന്നതിൽ വ്യക്ത ലഭിച്ചിട്ടില്ല. വെള്ളത്തൂവൽ പോലീസും ഫയർഫോഴ്സും സ്ഥലത്തെത്തി മൃതദേഹങ്ങൾ ആശുപത്രിയിലേക്ക് മാറ്റി.