ദേശീയപാതയിലെ കുഴിയിൽ വീണ് ഓട്ടോറിക്ഷ മറിഞ്ഞു

കാഞ്ഞങ്ങാട്: ദേശീയപാതയിലെ കുഴിയിൽ വീണ് ഓട്ടോറിക്ഷ മറിഞ്ഞ് അപകടം. ഓട്ടോയിൽ സഞ്ചരിച്ചിരുന്ന അമ്മയും കുഞ്ഞും റോഡിലേക്കു തെറിച്ചുവീണു. അമ്മയുടെ കൈയിലുണ്ടായിരുന്ന ഒന്നരവയസ്സുള്ള കുഞ്ഞ് വീണത് വെള്ളം നിറഞ്ഞ കുഴിയിൽ. ഇന്നലെ കാഞ്ഞങ്ങാട് കുളിയങ്കാലിലാണ് സംഭവം. അമ്പലത്തിലേക്ക് പോകുകയായിരുന്നു അമ്മയും കുഞ്ഞും. കഴിഞ്ഞ രാത്രിയിൽ പെയ്ത മഴയിലാണ് കുഴികൾ രൂപപ്പെട്ടത്.

ചെറുതും വലുതുമായ ഒന്നിലേറെ കുഴികളുണ്ടായിരുന്നു. കുഴിയിൽ ടയർ പതിഞ്ഞതും ഓട്ടോറിക്ഷ തെന്നി മറിയുകയായിരുന്നു. ‘അപകടം കണ്ട് ഓടിയെത്തുമ്പോൾ കുഞ്ഞെവിടെയെന്ന് നോക്കുകയായിരുന്നു അമ്മ. കുഴിയിലെ വെള്ളത്തിലേക്കാണ് കുട്ടി വീണിരുന്നത്. വെള്ളത്തിൽ മുങ്ങിപ്പോയിരുന്നു. പെട്ടെന്നു എടുത്തതിനാൽ അപായമൊന്നും സംഭവിച്ചില്ലെന്ന്’ ദൃക്‌സാക്ഷികൾ പറഞ്ഞു. ഇവിടുത്തെ റോഡിലെ കുഴി മാസങ്ങളായി അറ്റകുറ്റ പണി നടത്താതെ തകർത്ത് കിടക്കുകയാണ്.

കഴിഞ്ഞ രാത്രിയിലെ മഴയിൽ ഇവിടെ വീണ്ടും വലിയ കുഴികൾ രൂപപ്പെട്ടു. ഇരു ചക്ര വാഹന യാത്രക്കാരുൾപ്പെടെ ദിനം പ്രതി ഇവിടെ അപകടത്തിൽപെടാറുണ്ട്. ബൈക്കിൽ പോകുകയായിരുന്ന കാഞ്ഞങ്ങാട് സൗത്തിലെ ദമ്പതിമാർ കഴിഞ്ഞ ദിവസം ഇവിടെ അപകടത്തിൽപെട്ടിരുന്നു. സംഭവത്തെ തുടർന്ന് കൗൺസിലർ ടി. മുഹമ്മദ്കുഞ്ഞി യുൾപ്പെടെയുള്ളവരെത്തി അധികൃതരെ വിവരമറിയിച്ചപ്പോൾ ഉച്ചയോടെ കുഴികളെല്ലാം അടച്ചു.