കുളത്തിൽ കുളിക്കാനായി പോയ അമ്മയെയും മകനെയും മുങ്ങി മരിച്ച നിലയിൽ കണ്ടെത്തി

പാലക്കാട്: കൊല്ലങ്കോട് നെന്മേനിയിൽ അമ്മയെയും മകനെയും കുളത്തിൽ മരിച്ച നിലയിൽ കണ്ടെത്തി. കുളിക്കാനിറങ്ങിയപ്പോഴുണ്ടായ അപകടമാകാം മരണ കാരണമെന്നാണ് പ്രാഥമിക നിഗമനം. നെന്മേനി കല്ലേരിപ്പൊറ്റയിൽ താമസിക്കുന്ന ബിന്ദു(46), മകൻ സനോജ്(11) എന്നിവരെയാണ് മരിച്ച നിലയിൽ കണ്ടെത്തിയത്. കൊടുകപ്പാറയിലെ അമ്പിട്ടൻചള്ള കുളത്തിൽ കുളിക്കാൻ ഇറങ്ങിയതാണ് ഇരുവരും.

ഇന്ന് രാവിലെ 9.30ഓടെയായിരുന്നു അപകടം. ബിന്ദുവിന് അപസ്മാരമുള്ളതായാണ് ലഭിക്കുന്ന വിവരം. അമ്മ കുളത്തിൽ മുങ്ങി പോകുന്നത് കണ്ട് രക്ഷപെടുത്താൻ ശ്രമിക്കവെയായിരിക്കാം മകനും മുങ്ങി പോയതെന്നാണ് ലഭ്യമാകുന്ന വിവരം. അതുവഴി വന്ന സമീപവാസികളായിരുന്നു ബിന്ദുവിന്റെ മൃതദേഹം കണ്ടത്. തുടർന്ന് ഇവർ ഫയർഫോഴ്സിനെ വിവരമറിയിച്ചു. വിവരമറിഞ്ഞ് സ്ഥലത്തെത്തിയ അഗ്നിശമന സേന കുളത്തിൽ തിരച്ചിൽ നടത്തുന്നതിനിടെയാണ് സനോജിന്റെ മൃതദേഹം കണ്ടെത്തിയത്. ഇരുവരുടെയും മൃതദേഹങ്ങൾ ജില്ലാശുപത്രി മോർച്ചറിയിലേക്ക് മാറ്റി. പോസ്റ്റുമോർട്ടത്തിന് ശേഷം കുടുംബത്തിന് വിട്ടുനൽകും.