ഭാര്യയുമായി അവിഹത ബന്ധമുണ്ടെന്ന് സംശയം; യോ​ഗ അദ്ധ്യാപകനെ ജീവനോടെ കുഴിച്ചുമൂടി യുവാവ്

ഭാര്യയുമായി അവിഹത ബന്ധമുണ്ടെന്ന് സംശയിച്ച് യോ​ഗ അദ്ധ്യാപകനെ ജീവനോടെ കുഴിച്ചുമൂടി യുവാവ്. ഹരിയാനയിലെ ചർ‍ഖി ദാ​ദ്രിയിലാണ് സംഭവം. കഴിഞ്ഞ ഡിസംബർ 24ന് നടന്ന സംഭവം മാസങ്ങൾക്കിപ്പുറമാണ് പുറം ലോകമറിയുന്നത്. റോത്തക്കിലെ സ്വകാര്യ സർവകലാശാലയിലെ യോ​ഗ അദ്ധ്യാപകനായ ജ​ഗദീപാണ് കൊല്ലപ്പെട്ടത്. പ്രതിയായ ഹർദീപ് ജ​ഗദീപ് താമസിച്ചിരുന്ന വീടിന്റെ ഉടമയായിരുന്നു.

ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന ജ​ഗദീപിനെ ഹർദീപും സുഹൃത്തുക്കളും ചേർന്നാണ് തട്ടിക്കൊണ്ടുപോയത്. പ്രദേശത്തെ പാടത്തിന് സമീപം കുഴൽക്കിണറിനെന്ന പേരിൽ എടുത്ത ഏഴടി കുഴിയിലാണ് ഇയാളെ ജീവനോടെ കുഴിച്ചുമൂടിയത്. കൈകാലുകൾ ബന്ധിക്കുകയും നിലവിളി പുറത്തു കേൾക്കാതിരിക്കാൻ ടേപ്പ് ഉപയോ​ഗിച്ച് വാമൂടുകയും ചെയ്തു.

ഫെബ്രുവരി മൂന്നിനാണ് യുവാവിനെ കാണാനില്ലെന്ന് കാട്ടി പൊലീസിൽ പരാതി എത്തുന്നത്. മൂന്നു മാസം നീണ്ട അന്വേഷണത്തിനൊടുവിലാണ് പ്രതിയെയും സുഹൃത്തുക്കളെയും പിടികൂടിയത്.