തീയറ്ററിൽ പരാജയം; ഭാഗ്യം തേടി ‘നിലാവുക്ക് എന്‍ മേല്‍ എന്നടി കോപം’ ഒടിടിയിലേക്ക്

ധനുഷിന്റെ സംവിധാനത്തില്‍ പുറത്തിറങ്ങിയ റൊമാന്റിക് കോമഡി ചിത്രമാണ് ‘നിലാവുക്ക് എന്‍ മേല്‍ എന്നടി കോപം’. വലിയ പ്രതീക്ഷയില്‍ തിയേറ്ററിലെത്തിയ സിനിമയ്ക്ക് നിര്‍ഭാഗ്യവശാല്‍ ബോക്‌സ് ഓഫീസില്‍ നേട്ടമുണ്ടാക്കാനായില്ല. ഇപ്പോഴിതാ ചിത്രത്തിന്റെ ഒടിടി റിലീസ് തീയതി പ്രഖ്യാപിച്ചിരിക്കുകയാണ്.

ആമസോണ്‍ പ്രൈം വീഡിയോയിലൂടെയാണ് നിലാവുക്ക് എന്‍ മേല്‍ എന്നടി കോപം ഒടിടിയിലെത്തുന്നത്. മാര്‍ച്ച് 21 മുതല്‍ ചിത്രം സ്ട്രീമിങ് ആരംഭിക്കും. ഫെബ്രുവരി 21 നായിരുന്നു നിലാവുക്ക് എന്‍ മേല്‍ എന്നടി കോപം തിയേറ്ററുകളിലെത്തിയത്. ചിത്രം 15 കോടിയില്‍ താഴെയാണ് ലൈഫ് ടൈം കളക്ഷന്‍ എന്നാണ് വിലയിരുത്തപ്പെടുന്നത്.

ധനുഷിന്റെ തന്നെ വണ്ടര്‍ബാര്‍ ഫിലിംസ് ആണ് നിലാവുക്ക് എന്‍ മേല്‍ എന്നടി കോപം നിര്‍മിച്ചത്. ജി വി പ്രകാശ് കുമാര്‍ ആണ് ചിത്രത്തിനായി സംഗീതം നല്‍കിയത്. സിനിമയിലെ ഗാനങ്ങള്‍ എല്ലാം വലിയ ശ്രദ്ധ നേടിയിരുന്നു. മലയാളിതാരങ്ങളായ മാത്യു തോമസ്, അനിഖ സുരേന്ദ്രന്‍, പ്രിയാ വാര്യര്‍ എന്നിവരാണ് മുഖ്യവേഷങ്ങളില്‍ എത്തുന്നത്. വെങ്കിടേഷ് മേനോന്‍, റാബിയ ഖാത്തൂണ്‍, രമ്യ രംഗനാഥന്‍ എന്നിവരും ചിത്രത്തിന്റെ ഭാഗമാകുന്നുണ്ട്.