പാകിസ്ഥാനിൽ കളിക്കാത്തത് എന്തുകൊണ്ട്: പ്രതികരിച്ച് ഹാർദിക് പാണ്ഡ്യ

ചാമ്പ്യൻസ് ട്രോഫി കിരീടം സ്വന്തമാക്കിയതിന് പിന്നാലെ പാകിസ്ഥാനിൽ കളിക്കാത്തത് എന്തുകൊണ്ടാണെന്ന ചോദ്യം നേരിട്ട് ഹാർദിക് പാണ്ഡ്യ. ഇക്കാര്യത്തിൽ തനിക്ക് മറുപടി പറയാൻ കഴിയില്ലെന്നാണ് താരം പ്രതികരിച്ചത്. പാകിസ്ഥാൻ ആരാധകർ ദുബായിലെത്തി മത്സരങ്ങൾ കാണുമെന്നാണ് ഞാൻ കരുതുന്നത്. ഇതിൽ കൂടുതൽ എനിക്ക് ഈ ചോദ്യത്തിൽ പ്രതികരിക്കാൻ സാധിക്കില്ലെന്ന് ഹാർദിക് പാണ്ഡ്യ പറഞ്ഞു.

ചാമ്പ്യൻസ് ട്രോഫി നേടിയ ഇന്ത്യൻ ടീമിൽ നിർണായക സാന്നിധ്യമായിരുന്നു ഹാർദിക് പാണ്ഡ്യ. അഞ്ച് മത്സരങ്ങളിൽ നിന്നായി നാല് വിക്കറ്റുകളാണ് ഹാർദിക് നേടിയത്. സെമി ഫൈനലിൽ ഓസ്ട്രേലിയയ്ക്കെതിരെയും ഫൈനലിൽ ന്യൂസിലാൻഡിനെതിരെയും ബാറ്റുകൊണ്ടും ഹാർദിക് തിളങ്ങിയിരുന്നു.

ഇപ്പോൾ താരം മുംബൈ ഇന്ത്യൻസ് ക്യാമ്പിലെത്തിയതായാണ് റിപ്പോർട്ടുകൾ സൂചിപ്പിക്കുന്നത്. ഇന്ത്യൻ പ്രീമിയർ ലീ​ഗിൽ മുംബൈ ഇന്ത്യൻസ് നായകനാണ് ഹാർദിക്. മാർച്ച് 23ന് ചെന്നൈ സൂപ്പർ കിങ്സിനെതിരെയാണ് മുംബൈ ഇന്ത്യൻസിന്റെ ആദ്യ മത്സരം.