വീര ധീര ശൂരന്‍: ചിയാന്‍ വിക്രം ചിത്രത്തിലെ പുതിയ ഗാനം പുറത്ത്

ചിയാന്‍ വിക്രം നായകനായി എത്തുന്ന പുതിയ ചിത്രമാണ് ‘വീര ധീര ശൂരന്‍’.എസ് യു അരുണ്‍ കുമാറാണ് ചിത്രം സംവിധാനം ചെയ്തിരിക്കുന്നത്. ചിത്രത്തിലെ പുതിയ ഗാനം അണിയറപ്രവര്‍ത്തകര്‍ പുറത്തിറക്കി. ‘ആത്തി അടി ആത്തി’ എന്നാരംഭിക്കുന്ന ഗാനത്തിന് സംഗീതം നല്‍കിയിരിക്കുന്നത് ജി വി പ്രകാശ് കുമാര്‍ ആണ്. സാധികയും ജി വി പ്രകാശ് കുമാറും ചേര്‍ന്നാണ് ഗാനം ആലപിച്ചിരിക്കുന്നത്. ഒരു റൊമാന്റിക് മൂഡില്‍ ഒരുക്കിയ ഗാനത്തില്‍ ചിയാന്‍ വിക്രമും ദുഷാര വിജയനുമാണ് പ്രത്യക്ഷപ്പെടുന്നത്.

ചിത്രം മാര്‍ച്ച് 27 ന് റിലീസിനെത്തും. ചിത്രം ഒരേ സമയം തമിഴിലും തെലുങ്കിലും പുറത്തിറങ്ങും. സിനിമയുടെ ടീസര്‍ നേരത്തെ പുറത്തുവന്നിരുന്നു. ഒരു നാടന്‍ ആക്ഷന്‍ ത്രില്ലറാകും വീര ധീര സൂരന്‍ എന്ന ഉറപ്പ് നല്‍കുന്നതാണ് ടീസര്‍. ചിയാനൊപ്പം എസ് ജെ സൂര്യ, സുരാജ് വെഞ്ഞാറമൂട് എന്നിവരുടെയും കിടിലന്‍ പെര്‍ഫോമന്‍സുകള്‍ ടീസര്‍ ഉറപ്പ് നല്‍കുന്നുണ്ട്.

രണ്ട് ഭാഗങ്ങളായി പുറത്തിറങ്ങുന്ന സിനിമയുടെ പാര്‍ട്ട് 2 ആണ് ഇപ്പോള്‍ പുറത്തിറങ്ങുന്നത്. ‘മല്ലിക കടൈ’ എന്നാണ് ഈ രണ്ടാമത്തെ ചാപ്റ്ററിന്റെ പേര്. തെന്നിന്ത്യയിലെ പ്രശസ്ത ഛായാഗ്രാഹകന്‍ തേനി ഈശ്വറായിരിക്കും സിനിമയ്ക്കായി ക്യാമറ ചലിപ്പിക്കുക. പേരന്‍പ്, കര്‍ണ്ണന്‍, മാമന്നന്‍ തുടങ്ങിയ തമിഴ് ചിത്രങ്ങളുടെയും പുഴു, നന്‍പകല്‍ നേരത്ത് മയക്കം, ഓസ്ലര്‍ തുടങ്ങിയ മലയാള സിനിമകളുടെയും ഛായാഗ്രഹണം നിര്‍വഹിച്ചത് തേനി ഈശ്വറായിരുന്നു. ദുഷാര വിജയനാണ് സിനിമയില്‍ നായികാ വേഷത്തിലെത്തുന്നത്. ജി വി പ്രകാശ് കുമാര്‍ ആണ് സിനിമയ്ക്ക് സംഗീതം ഒരുക്കുന്നത്. എച്ച് ആര്‍ പിക്‌ചേഴ്ചിന്റെ ബാനറില്‍ റിയ ഷിബു ആണ് നിര്‍മ്മാണം.