ബാറ്റല്ല കൈയിൽ തോക്ക്; പുതിയ വേഷത്തിൽ വാർണർ

മുന്‍ ഓസ്ട്രേലിയന്‍ ക്രിക്കറ്റ് ഇതിഹാസം ഡേവിഡ് വാര്‍ണര്‍ സിനിമയിലേക്ക്. തെലുങ്ക് താരം നിഥിന്‍ നായകനായി വരാനിരിക്കുന്ന ചിത്രമായ റോബിന്‍ഹുഡില്‍ വാര്‍ണര്‍ അതിഥി വേഷത്തില്‍ എത്തും. 2024 സെപ്റ്റംബറിലെ ചിത്രത്തിന്റെ ഓസ്ട്രേലിയ ഷെഡ്യൂളിനിടെ വാര്‍ണറുടെ ചിത്രത്തിലെ ഭാഗങ്ങള്‍ ചിത്രീകരിച്ചതായാണ് റിപ്പോര്‍ട്ട്.

ചിത്രത്തിന്റെ നിര്‍മ്മാതാവ് രവിശങ്കര്‍ സംഭവം സ്ഥിരീകരിച്ചു ”ഡേവിഡ് വാര്‍ണര്‍ ചിത്രത്തില്‍ ഒരു അതിഥി വേഷം ചെയ്തിട്ടുണ്ട്, അത് ആവേശകരമാണ്” അദ്ദേഹം അടുത്തിടെ ഒരു ചടങ്ങില്‍ പറഞ്ഞു. ഐപിഎല്‍ സമയത്ത് സണ്‍റൈസേഴ്‌സ് ഹൈദരാബാദ് (എസ്ആര്‍എച്ച്) ഫ്രാഞ്ചൈസിയുടെ ഭാഗമായിരുന്ന സമയത്ത് ഡേവിഡ് വാര്‍ണര്‍ തെലുങ്ക് പ്രേക്ഷകര്‍ക്കിടയില്‍ വളരെ ജനപ്രിയമായ മുഖമായിരുന്നു.

2024 സെപ്റ്റംബറിലാണ് ഡേവിഡ് വാര്‍ണറുടെ രംഗങ്ങള്‍ ചിത്രീകരിച്ചത് എന്നാണ് വിവരം. അന്ന്, സിനിമയുടെ സെറ്റുകളില്‍ ക്രിക്കറ്റ് താരത്തിന്റെ സാന്നിധ്യം ഉള്ള ചിത്രങ്ങള്‍ ചോര്‍ന്നിരുന്നു. ഒരു ഗ്യാംങ് സ്റ്റാര്‍ വേഷത്തില്‍ നില്‍ക്കുന്ന വാര്‍ണറുടെ അന്നത്തെ ചിത്രങ്ങള്‍ ചോര്‍ന്നപ്പോള്‍, അദ്ദേഹം പുഷ്പ 2വില്‍ ഉണ്ട് എന്ന രീതിയില്‍ വാര്‍ത്തകള്‍ വന്നിരുന്നു. എന്നാല്‍ ആ അഭ്യൂഹം പുഷ്പ 2 ഇറങ്ങിയപ്പോള്‍ തീര്‍ന്നു. ഇപ്പോള്‍ ആ ചിത്രത്തിന് മറുപടിയും ലഭിച്ചു.