ആദ്യ വനിത മിൽമ യൂണിയൻ ചെയർപേഴ്‌സണായി മണി വിശ്വനാഥ് ചുമതലയേറ്റു

തിരുവനന്തപുരം മിൽമ യൂണിയൻ തെരഞ്ഞെടുപ്പിൽ എൽഡിഎഫിന് മികച്ച വിജയം. ഇതേ തുടർന്നാണ് ആലപ്പുഴ സ്വദേശി മണി വിശ്വനാഥ് യൂണിയൻ ചെയർപേഴ്‌സണായി ചുമതലയേറ്റത്. അവർ മുമ്പ് തിരുവനന്തപുരം യൂണിയൻ അഡ്മിനിസ്ട്രേറ്റീവ് കമ്മിറ്റി കൺവീനറായി സേവനമനുഷ്ഠിച്ചു. ഇതാദ്യമായാണ് ഒരു വനിത മിൽമ യൂണിയൻ ചെയർപേഴ്‌സണായി ചുമതലയേൽക്കുന്നത്.

ഏകദേശം ഒന്നര വർഷം മുമ്പ് നടന്ന യൂണിയൻ തിരഞ്ഞെടുപ്പിന്റെ ഫലം ഹൈക്കോടതിയുടെ അംഗീകാരം ലഭിച്ച് കഴിഞ്ഞ ദിവസമാണ് പ്രഖ്യാപിച്ചത്. ഭരണത്തിന് കീഴിലുള്ള ക്ഷീര സഹകരണ സംഘങ്ങളിലെ വോട്ടുകൾ കൂടി ഉൾപ്പെടുത്തി ഫലം പ്രഖ്യാപിക്കാൻ ഡിവിഷൻ ബെഞ്ച് ആവശ്യപ്പെട്ടിരുന്നു. ഫലത്തിൽ എൽ.ഡി.എഫിന് ഒമ്പത് സീറ്റും യു.ഡി.എഫിന് അഞ്ച് സീറ്റും അതനുസരിച്ച് ലഭിച്ചു.

ചരിത്രത്തിലാദ്യമായി തിരുവനന്തപുരം മിൽമ യൂണിയനിൽ എൽഡിഎഫ് അധികാരത്തിലെത്തി. നിലവിൽ എറണാകുളം യൂണിയനിൽ യുഡിഎഫും മലബാർ യൂണിയന്റെ ചുമതല എൽഡിഎഫുമാണ്. പുതിയ അധികാരം കൂടി വരുന്നതോടെ മിൽമ ഫെഡറേഷനും എൽഡിഎഫിന് ഭരിക്കാം.

പത്തിയൂർ കാലായിലെ ക്ഷീര സഹകരണ സംഘം പ്രസിഡന്റാണ് മണി വിശ്വനാഥ്. മുതുകുളം ബ്ലോക്ക് പഞ്ചായത്ത് ആരോഗ്യ സ്റ്റാൻഡിങ് കമ്മിറ്റി ചെയർപേഴ്‌സൺ കൂടിയാണ്. വിവിധ കൃഷി, പഞ്ചായത്ത് വകുപ്പുകളിൽ 18 വർഷത്തിലേറെയായി പ്രവൃത്തിപരിചയമുണ്ട് മണി.