പനിയില്‍ വിറച്ച് കേരളം. രണ്ടാഴ്ചയ്ക്കിടെ ഒരു ലക്ഷത്തിലേറെപ്പേര്‍ക്ക് പനി

തിരുവനന്തപുരം: മഴ കനത്തതോടെ കേരളം പകര്‍ച്ചപ്പനിയുടെ പിടിയില്‍. രണ്ടാഴ്ചയ്ക്കിടെ ഒരുലക്ഷത്തിലേറെ പേര്‍ക്കാണ് പനിയും അനുബന്ധ അസുഖങ്ങളും ബാധിച്ചത്. നിത്യേന പതിനായിരത്തിലേറെ പനിക്കേസുകള്‍ സര്‍ക്കാര്‍ ആശുപത്രികളില്‍ മാത്രം റിപ്പോര്‍ട്ട് ചെയ്യുന്നു. സ്വകാര്യ ആശുപത്രികളില്‍ ഇതിന്റെ പലമടങ്ങുണ്ടാവും രോഗികള്‍.

പനിക്ക് പുറമെ മലിനജലത്തിലൂടെ ഉണ്ടാകുന്ന ഹെപ്പറ്റെറ്റ് എ രോഗവും സംസ്ഥാനത്ത് പടരുകയാണ്. 1,134 പേര്‍ ഇക്കാലയളവില്‍ ഹെപ്പറ്റൈറ്റസ് എ ബാധിതരായി. നാല് മരണങ്ങളുമുണ്ടായി.

ഡെങ്കിപ്പനി ബാധിച്ച് അഞ്ചും എലിപ്പനി മൂലം 17ഉം പേര്‍ മരിച്ചു. തിരുവനന്തപുരം, കോഴിക്കോട്, കൊല്ലം, പാലക്കാട്, കണ്ണൂര്‍ ജില്ലകളിലാണ് എലിപ്പനി, ഡെങ്കി മരണങ്ങളുണ്ടായത്. മഴക്കാലമെത്തിയതോടെ കനത്ത ജാഗ്രത പാലിക്കണമെന്നാണ് സര്‍ക്കാര്‍ മുന്നറിയിപ്പ്.