രാജ്യത്തെ ആരോഗ്യ ഇൻഷുറൻസ് കമ്പനികളുടെ പ്രവർത്തനക്ഷമത വ്യക്തമാക്കുന്ന ഇൻകേഡ് ക്ലെയിം റേഷ്യോ (ICR) കണക്കുകൾ ഐആർഡിഎഐ പുറത്തുവിട്ടു. 2024-25 സാമ്പത്തിക വർഷത്തിൽ ലൈഫ് ഇൻഷുറൻസ് ഇതര വിഭാഗത്തിൽ 82.88 ശതമാനമാണ് ശരാശരി ക്ലെയിം അനുപാതം.
ക്ലെയിം തുകയിൽ വൻ വർദ്ധനവ്
കഴിഞ്ഞ വർഷത്തെ അപേക്ഷിച്ച് ഇൻഷുറൻസ് ക്ലെയിം തുകയിൽ 9.46 ശതമാനത്തിന്റെ വർദ്ധനവുണ്ടായി. മുൻ വർഷം 1.72 ലക്ഷം കോടി രൂപയായിരുന്ന ആകെ ക്ലെയിം തുക ഇത്തവണ 1.88 ലക്ഷം കോടി രൂപയായി ഉയർന്നു. ഇതിൽ ഏറ്റവും കൂടുതൽ ക്ലെയിമുകൾ തീർപ്പാക്കിയത് പൊതുമേഖലാ ഇൻഷുറൻസ് കമ്പനികളാണ്. 97.30 ശതമാനമാണ് ഇവരുടെ ക്ലെയിം അനുപാതം.
എന്താണ് ഈ ക്ലെയിം റേഷ്യോ?
ഒരു ഇൻഷുറൻസ് കമ്പനി ജനങ്ങളിൽ നിന്ന് പ്രീമിയമായി സമാഹരിക്കുന്ന തുകയും, തിരിച്ച് ക്ലെയിമായി നൽകുന്ന തുകയും തമ്മിലുള്ള അനുപാതമാണ് ‘ഇൻകേഡ് ക്ലെയിം റേഷ്യോ’. ഇത് എത്രത്തോളം കൂടുതലാണോ അത്രത്തോളം തുക കമ്പനി ക്ലെയിമുകൾക്കായി ചിലവഴിക്കുന്നു എന്ന് മനസ്സിലാക്കാം. അതുപോലെ, ലഭിച്ച അപേക്ഷകളിൽ എത്രയെണ്ണം തീർപ്പാക്കി എന്ന് വ്യക്തമാക്കുന്നതാണ് ‘ക്ലെയിം സെറ്റിൽമെന്റ് റേഷ്യോ’. ഇൻഷുറൻസ് കമ്പനികളുടെ സാമ്പത്തിക ഭദ്രതയും സേവന നിലവാരവും അളക്കാൻ ഈ കണക്കുകൾ ഉപഭോക്താക്കളെ സഹായിക്കും.