സിഎംആർഎൽ മാനദണ്ഡങ്ങൾ മറികടന്ന് 40000 കോടിയുടെ അനധികൃത മണൽ ഖനനത്തിന് മുഖ്യമന്ത്രി ഇടപെട്ടെന്ന് മാത്യു കുഴൽനാടൻ എംഎൽഎ

സിഎംആർഎല്ലിന് വേണ്ടി മുഖ്യമന്ത്രി പിണറായി വിജയൻ നടത്തിയ ഇടപെടലുകൾ വെളിപ്പെടുത്തിയ മാത്യു കുഴൽനാടൻ എംഎൽഎ തിങ്കളാഴ്ച മറ്റൊരു രാഷ്ട്രീയ കൊടുങ്കാറ്റിനു തുടക്കമിട്ടു. കേരള ഭൂപരിഷ്‌കരണ നിയമത്തിൽ ഇളവ് ആവശ്യപ്പെട്ട കമ്പനിക്ക് വേണ്ടി മുഖ്യമന്ത്രി റവന്യൂ വകുപ്പിനെ മറികടന്ന് ഇടപെട്ടുവെന്നും തിരുവനന്തപുരത്ത് നടത്തിയ വാർത്താസമ്മേളനത്തിൽ കുഴൽനാടൻ ആരോപിച്ചു.

വീണ വിജയൻ്റെ എക്‌സലോജിക് കമ്പനി ഒരു സേവനവും നൽകാതെ പണം സ്വീകരിച്ചുവെന്ന കേസിൽ മുഖ്യമന്ത്രി പിണറായി വിജയൻ്റെ കൃത്യമായ പങ്ക് കണ്ടെത്താനുള്ള ദൗത്യത്തിലാണ് താൻ ഇപ്പോഴെന്നും കുഴൽനാടൻ പറഞ്ഞു. സിഎംആർഎല്ലിനു നൽകിയ കരാർ നിലനിർത്താൻ മുഖ്യമന്ത്രി പ്രത്യേകം ഇടപെട്ടതു സംബന്ധിച്ച സംശയങ്ങൾ ഉയർന്നു.സിഎംആർഎലിനെ സഹായിക്കാൻ മുഖ്യമന്ത്രിയുടെ ഇടപെടലിൻ്റെ തെളിവുകൾ നൽകിയിട്ടും കൃത്യമായ മറുപടി ലഭിച്ചില്ല.