വയനാട്ടിൽ മുള്ളന്‍കൊല്ലിയില്‍ വീണ്ടും കടുവ ആക്രമണം

വന്യമൃഗങ്ങളുടെ ആക്രമണത്തിൻ്റെ തുടർച്ചയായി മുള്ളൻകൊല്ലിയിലും നെയ്ക്കുപ്പയിലും കടുവ വളർത്തുമൃഗങ്ങളെ കൊന്നു. മുള്ളൻകൊല്ലി ടൗണിന് സമീപം വീണ്ടും എത്തിയ കടുവ തോമസിൻ്റെ തൊഴുത്തിൽ നിന്ന് രണ്ട് വയസ്സുള്ള കാളക്കുട്ടിയെ എടുത്തുകൊണ്ടുപോയി. 300 മീറ്റർ അകലെയാണ് മൃതദേഹം കണ്ടെത്തിയത്. ഇതേത്തുടർന്ന് വനപാലകർ തിരച്ചിൽ നടത്തി. മുന്നറിയിപ്പും നൽകി. നടവയൽ നെയ്ക്കുപ്പയിലെ വനാതിർത്തിയിൽ ഇന്നലെയും കടുവ പോത്തിനെ കൊന്നിരുന്നു.

പറപ്പള്ളിൽ ഷാജിയുടേതാണ് കൊല്ലപ്പെട്ട പോത്ത്. വനത്തോട് ചേർന്നുള്ള പറമ്പിൽ മൂന്ന് പോത്തുകളെ മേയാൻ വിട്ടതായും ഈ സമയം കടുവ ഇരച്ചുകയറിയതായും പ്രദേശവാസികൾ പറയുന്നു.പുൽപ്പള്ളി മുള്ളൻകൊല്ലി പഞ്ചായത്തിലെ വിവിധ പ്രദേശങ്ങൾ ഒരു മാസത്തിലേറെയായി കടുവ ഭീതിയിലാണ്. മുള്ളൻകൊല്ലി പഞ്ചായത്തിലെ പുൽപ്പള്ളി 56, ആശ്രമക്കൊല്ലി, തണ്ണിത്തെരുവ്, കുറിച്ചി പട്ട, സുരഭി കവല എന്നിവിടങ്ങളിലെ പശുക്കളെയും പശുക്കിടാക്കളെയും കടുവ കൊന്നിട്ടുണ്ട്.