രാജസ്ഥാനിലെ അജ്മീറിൽ കേരള പോലീസിന് നേരെ അക്രമികൾ വെടിയുതിർത്തു; നീണ്ട ഏറ്റുമുട്ടലിനൊടുവിൽ കുപ്രസിദ്ധ സംഘം പിടിയിൽ

രണ്ട് കുപ്രസിദ്ധ ചെയിൻ സ്‌നാച്ചർമാരെ പിന്തുടർന്ന് രാജസ്ഥാനിലെ അജ്മീറിലെത്തിയ കേരള പോലീസ് ഉദ്യോഗസ്ഥർക്ക് നേരെ അക്രമികൾ വെടിവെച്ചു. . സംഭവത്തിൽ ആർക്കും പരിക്കില്ലെന്നാണ് റിപ്പോർട്ട്.കേരളത്തിൻ്റെ വിവിധ ഭാഗങ്ങളിൽ നിന്ന് സ്വർണാഭരണങ്ങൾ തട്ടിയെടുത്ത് ഉത്തരേന്ത്യയിലേക്ക് പോകുന്നത് പതിവാക്കിയ ഉത്തരാഖണ്ഡ് സ്വദേശികളായ ഷെഹ്‌സാദിനെയും സാജിദിനെയും തേടി പോലീസ് അജ്മീറിലെത്തി.

ദർഗ റോഡ് പോലീസ് സ്‌റ്റേഷന് സമീപത്ത് വെച്ചാണ് കേരളാ പോലീസ് പ്രതികളെ ആദ്യം കണ്ടത്.പ്രതികളെ പിടികൂടാൻ പോലീസ് ശ്രമിച്ചപ്പോഴാണ് വെടിവെപ്പുണ്ടായത്. പോലീസിന് നേരെ അക്രമികൾ മൂന്ന് റൗണ്ട് വെടിയുതിർത്തു. എന്നാൽ, മൂന്ന് മണിക്കൂർ നീണ്ട പരിശ്രമത്തിനൊടുവിൽ പോലീസ് രണ്ട് അക്രമികളെയും കീഴടക്കി. ഇവരിൽ നിന്ന് രണ്ട് അനധികൃത തോക്കുകളും പിടിച്ചെടുത്തു.റിപ്പോർട്ടുകൾ പ്രകാരം രണ്ടുപേർക്കുമെതിരെ കേരളമുൾപ്പെടെ രാജ്യത്തിൻ്റെ വിവിധ ഭാഗങ്ങളിൽ കേസുകളും രജിസ്റ്റർ ചെയ്തിട്ടുണ്ട്.