പാലേരി മാണിക്യം വീണ്ടും തിയേറ്ററുകളിലേക്ക്; ഇത്തവണ 4k പതിപ്പിലാണ് എത്തുന്നത്

നടൻ മമ്മൂട്ടി പ്രധാനവേഷത്തിലെത്തി നിരവധി പുരസ്കാരങ്ങൾ സ്വന്തമാക്കിയ ചിത്രമാണ് പാലേരി മാണിക്യം ഒരു പാതിരാ കൊലപാതകത്തിന്റെ കഥ. ചിത്രം വീണ്ടും റി റിലീസിനൊരുങ്ങുന്നു .

പാലേരി‌മാണിക്യത്തിന്റെ ഫോർ കെ പതിപ്പാണ് തിയേറ്ററിലെത്തിക്കുന്നത്. സിനിമയുടെ നിർമാതാവ് മഹാ സുബൈറാണ് സിനിമ തിയേറ്ററിലെത്തിക്കാനുള്ള നേതൃത്വം വഹിക്കുന്നത്.

മൂന്നാം തവണയാണ് പാലേരി മാണിക്യം റി റിലീസ് ചെയ്യുന്നത്. ഇതിന് മുമ്പ് 2009- ൽ സംസ്ഥാന പുരസ്കാരങ്ങൾ നേടിയ സമയത്തും ചിത്രം തിയേറ്ററുകളിൽ വീണ്ടും പ്രദർശിപ്പിച്ച് വിജയം കൈവരിച്ചിരുന്നു. മമ്മൂട്ടിയുടെ മൂന്ന് വ്യത്യസ്ത വേഷങ്ങളിൽ തകർത്താടിയ മമ്മൂട്ടിയുടെ പ്രകടനം ബി​ഗ് സ്ക്രീനിൽ കാണാൻ പ്രേക്ഷകർ ഇത്തവണയും എത്തുമെന്ന വിശ്വാസത്തിലാണ് അണിയറപ്രവർത്തകർ.

ടി.പി രാജീവന്റെ കഥയെ അടിസ്ഥാനമാക്കി രഞ്ജിത്ത് സംവിധാനം ചെയ്ത ചിത്രത്തിൽ ഹരിദാസ്, ഖാലിദ്, മുരിക്കുംകുന്നത്ത് അഹമ്മദ് ഹാജി എന്നീ 3 കഥാപാത്രങ്ങളെയാണ് മമ്മൂട്ടി ചെയ്തത്. ചിത്രത്തിൽ കടത്തനാടൻ ശൈലിയിലുള്ള മമ്മൂട്ടിയുടെ സംഭാഷണങ്ങളും ഏറെ ശ്രദ്ധിക്കപ്പെട്ടിരുന്നു. 1957 മാർച്ച് 30 ന് പാലേരിയിൽ കൊല്ലപ്പെട്ട മാണിക്യം എന്ന യുവതിയുടെ കൊലപാതകത്തിന്റെ അന്വേഷണ പശ്ചാത്തലത്തലമാണ് സിനിമ.