കാറിൽ കടത്തിയ എംഡിഎംഎയുമായി രണ്ടു പേരെ പൊലീസ് പിടികൂടി

പെരിയ: കാറിൽ കടത്തിയ എംഡിഎംഎയുമായി രണ്ടു പേരെ പൊലീസ് പിടികൂടി. മുള്ളേരിയ പൊവ്വലിലെ മുഹമ്മദ്‌ ഡാനിഷ് (30), ചെങ്കള ആലംപാടിയിലെ അബ്ദുൾ ഖാദർ (40 )എന്നിവരെയാണ് ബേക്കൽ എസ്‌ഐ എം സവ്യസാചിയുടെ നേതൃത്വത്തിലുള്ള സംഘം അറസ്റ്റ് ചെയ്തത്. ഇവരിൽ നിന്ന് രാജ്യാന്തര വിപണിയിൽ 10 ലക്ഷത്തിലധികം രൂപ വിലവരുന്ന 256.02 ഗ്രാം എംഡിഎംഎയാണ് പൊലീസ് പിടികൂടിയത്. എംഡിഎംഎ കണ്ടെത്തിയത് വാഹനമുൾപ്പെടെ കസ്റ്റഡിയിൽ എടുക്കുകയും ചെയ്തു.

കഴിഞ്ഞ ദിവസം രാത്രിയാണ് പെരിയ പുളിക്കാലിൽ നിന്നാണ് ഇരുവരും അറസ്റ്റിലായത്. സംശയം തോന്നിയ നാട്ടുകാർ കാർ തടഞ്ഞ് പൊലീസിൽ വിവരമറിയിക്കുകയായിരുന്നു. ബേക്കൽ ഡിവൈഎസ്‌പിയുടെ സ്ക്വാഡ് അംഗങ്ങളും സീനിയർ സിവിൽ പൊലീസ് ഓഫിസർമാരുമായ സുഭാഷ്, കെ കെ സജീഷ്, സുഭാഷ് ചന്ദ്രൻ, എം സന്ദീപ് എന്നിവർ ചേർന്നാണ് പ്രതികളെ പിടികൂടിയത്.