ജൂൺ 2 മുതൽ നെറ്റ്ഫ്ലിക്സ് ഈ പ്രധാന സേവനം നിർത്തലാക്കുന്നു

കാലിഫോര്‍ണിയ: ലോകമൊട്ടാകെ ലക്ഷക്കണക്കിന് ആളുകളാണ് വിനോദത്തിനായി നെറ്റ്ഫ്ലിക്സ് എന്ന ഒടിടി പ്ലാറ്റ്ഫോം ഉപയോഗിക്കുന്നത്. ഉപഭോക്തൃ സൗകര്യം വർധിപ്പിക്കുന്നതിനായി കമ്പനി വിവിധ സവിശേഷതകൾ വാഗ്ദാനം ചെയ്യുന്നുണ്ട്. എന്നാൽ ഇപ്പോൾ ചില ഉപയോക്താക്കൾക്ക് അസ്വസ്ഥതയുണ്ടാക്കുന്ന വാർത്തകൾ നെറ്റ്‌ഫ്ലിക്സിന്‍റെ ഭാഗത്ത് നിന്നുള്ളത്. നിങ്ങൾ ആമസോൺ ഫയർ ടിവി സ്റ്റിക്ക് വഴിയാണ് നെറ്റ്ഫ്ലിക്സ് കാണുന്നതെങ്കിൽ, ഉടൻ തന്നെ നിങ്ങൾക്ക് പ്രശ്നങ്ങൾ നേരിടേണ്ടി വന്നേക്കാം. 2025 ജൂൺ 2 മുതൽ ചില പഴയ ഫയർ ടിവി സ്റ്റിക്ക് ഡിവൈസുകളിൽ നെറ്റ്ഫ്ലിക്സ് പ്രവർത്തിക്കുന്നത് നിർത്തുമെന്ന് ആമസോൺ പ്രഖ്യാപിച്ചു. അതായത് പഴയ മോഡലുകൾ ഉള്ള ആളുകൾക്ക് ഈ തീയതിക്ക് ശേഷം നെറ്റ്ഫ്ലിക്സ് ആക്സസ് ചെയ്യാൻ കഴിയില്ല.

ഏതൊക്കെ ഡിവൈസുകളെയാണ് ഇത് ബാധിക്കുക?

2014നും 2016നും ഇടയിൽ പുറത്തിറക്കിയ ഒരു ആമസോൺ ഫയർ ടിവി ഡിവൈസ് ആണ് നിങ്ങളുടെ കൈവശമെങ്കിൽ, നിങ്ങൾക്ക് പ്രശ്‍നങ്ങൾ നേരിടേണ്ടി വന്നേക്കാം. പ്രത്യേകിച്ചും, 2014ൽ പുറത്തിറങ്ങിയ ഫയർ ടിവിയിലെ ഒന്നാം തലമുറ ഫയർ ടിവി സ്റ്റിക്ക്, 2016ൽ പുറത്തിറക്കിയ അലക്‌സ വോയ്‌സ് റിമോട്ട് ഉള്ള ഫയർ ടിവി സ്റ്റിക്ക് എന്നിവയിൽ ഇനി നെറ്റ്ഫ്ലിക്സ് പിന്തുണ ലഭിക്കില്ല.

ഈ ഫയർ ടിവി സ്റ്റിക്ക് ഡിവൈസുകളിൽ ഒന്നിലൂടെയാണ് നിങ്ങൾ നെറ്റ്ഫ്ലിക്സ് ഉപയോഗിക്കുന്നതെങ്കിൽ, നിങ്ങൾ പുതിയ മോഡലിലേക്ക് അപ്‌ഗ്രേഡ് ചെയ്യേണ്ടതുണ്ട്. ഏറ്റവും പുതിയ ആമസോൺ ഫയർ ടിവി സ്റ്റിക്ക് മെച്ചപ്പെട്ട വേഗത, മെച്ചപ്പെടുത്തിയ ചിത്ര നിലവാരം, നിരവധി പുതിയ സവിശേഷതകൾ എന്നിവ വാഗ്ദാനം ചെയ്യുന്നു.

ആമസോൺ ഫയർ ടിവി സ്റ്റിക്ക് നിങ്ങൾക്ക് ഫ്ലിപ്‍കാർട്ടിൽ നിന്നും ആമസോണിൽ നിന്നും വാങ്ങാം, സാധാരണയായി അയ്യായിരം മുതൽ ആറായിരം രൂപ വരെയാണ് വില. വാങ്ങാൻ ഉത്സവ സീസണുകളിലെ കിഴിവുകൾക്കായി കാത്തിരിക്കുക, കാരണം നിങ്ങളുടെ പുതിയ ഉപകരണം വാങ്ങുമ്പോൾ നിങ്ങൾക്ക് ധാരാളം വിലക്കുറവുകൾ ലഭിച്ചേക്കാം.

അതേസമയം, വിപുലവും എക്സ്ക്ലൂസീവ് ഉള്ളടക്കവും ആസ്വദിക്കാൻ നിങ്ങൾ ഒരു നെറ്റ്ഫ്ലിക്സ് സബ്സ്ക്രിപ്ഷൻ എടുക്കുന്നതിനെക്കുറിച്ച് ആലോചിക്കുന്നുണ്ടോ? ആവർത്തിച്ചുള്ള പ്രതിമാസ ചെലവുകൾ ഒഴിവാക്കാൻ ആഗ്രഹിക്കുന്നുവെങ്കിൽ, രാജ്യത്തെ മുൻനിര ടെലികോം ദാതാക്കളായ എയർടെൽ നിങ്ങൾക്ക് മികച്ചൊരു ഓഫർ നൽകുന്നു. എയർടെൽ ഉപയോക്താക്കൾക്ക്, മികച്ച മൂല്യം വാഗ്ദാനം ചെയ്യുന്ന 1798 രൂപ വിലയുള്ള ഒരു മികച്ച പ്ലാന്‍ ലഭ്യമാണ്. ഇതിൽ 84 ദിവസത്തെ വാലിഡിറ്റി, അൺലിമിറ്റഡ് കോളിംഗ്, 100 സൗജന്യ എസ്എംഎസ്, പ്രതിദിനം 3 ജിബി ഡാറ്റ തുടങ്ങിയവയും ഉൾപ്പെടുന്നു.