മലപ്പുറത്ത് ഷോക്കേറ്റ് പത്രവിതരണക്കാരനായ വിദ്യാർഥി മരിച്ചു

വള്ളിക്കുന്ന് : മലപ്പുറം വള്ളിക്കുന്നിൽ വെള്ളത്തിൽ പൊട്ടി വീണ വൈദ്യുതി ലൈനിൽ തട്ടി പത്രവിതരണക്കാരനായ വിദ്യാർഥി മരിച്ചു. പരപ്പനങ്ങാടി ചെട്ടിപ്പടി വാക്കയിൽ ശ്രീരാഗ് (17) ആണ് മരണപ്പെട്ടത്.

വള്ളിക്കുന്ന് ബാലാതിരുത്തിയിലാണ് ദാരുണ സംഭവം നടന്നത്. ഞായറാഴ്ച രാവിലെ ഏഴോടെ പത്രവിതരണത്തിനിടെ വെള്ളത്തിൽ പൊട്ടി വീണ് കിടക്കുകയായിരുന്ന വൈദ്യുതി ലൈനിൽ നിന്ന് ഷോക്കേൽക്കുകയായിരുന്നു. നാട്ടുകാരാണ് ശ്രീരാഗ് ഷോക്കേറ്റ് കിടക്കുന്നത് കണ്ടത്.

കടലുണ്ടിയിലെ സ്വകാര്യാശുപത്രിയിലും പിന്നീട് കോഴിക്കോട് മെഡിക്കൽ കോളേജിലും എത്തിച്ചെങ്കിലും ജീവൻ രക്ഷിക്കാനായില്ല. പ്ലസ് ടു പരീക്ഷയിൽ ഉന്നതവിജയം നേടിയ വിദ്യാർത്ഥിയായിരുന്നു മരണപ്പെട്ട ശ്രീരാഗ്.