കിടിലന്‍ നൃത്തച്ചുവടുകളുമായി മോഹന്‍ലാലും ശോഭനയും റീലുകൾ ഇനി ‘കൊണ്ടാട്ടം’ ഭരിക്കും;

ആരാധകര്‍ ഏറെ പ്രതീക്ഷയോടെ കാത്തിരുന്ന തുടരും സിനിമയുടെ പ്രൊമോ സോങ് എത്തി. ‘കൊണ്ടാട്ടം’ എന്ന് പേരിട്ടിരിക്കുന്ന ഗാനം പാടിയിരിക്കുന്നത് എം ജി ശ്രീകുമാറും രാജലക്ഷ്മിയും ചേര്‍ന്നാണ്. ജേക്‌സ് ബിജോയ് സംഗീതം നല്‍കിയിരിക്കുന്ന ഗാനത്തിന് വരികള്‍ രചിച്ചിരിക്കുന്നത് വിനായക് ശശികുമാറാണ്. ഡോണ്‍ മാക്സാണ് പ്രൊമോ സോങ് എഡിറ്റ് ചെയ്തിരിക്കുന്നത്. മോഹന്‍ലാല്‍, ശോഭന തുടങ്ങിയവരുടെ കിടിലന്‍ നൃത്തച്ചുവടുകള്‍ തന്നെയാണ് ഈ ഗാനത്തിന്റെ ഹൈലൈറ്റ്. ഇവര്‍ക്കൊപ്പം സിനിമയുടെ സംവിധായകന്‍ തരുണ്‍ മൂര്‍ത്തിയും ചുവടുകള്‍ വെക്കുന്നുണ്ട്.

ഇപ്പോഴിതാ 3 ദിവസത്തില്‍ ആഗോള കളക്ഷന്‍ 69 കോടി എന്ന് ഔദ്യോഗികമായി പ്രഖ്യാപിച്ചിരിക്കുകയാണ്. ട്രാക്കറായ സാക്നില്‍കിന്‍റെ കണക്ക് പ്രകാരം ചൊവ്വാഴ്ച തുടരും ബോക്സോഫീസിലെ ആധിപത്യം തുടരുകയാണ്. 6.50 കോടിയാണ് ഇന്ത്യയിലെ ചിത്രത്തിന്‍റെ ബോക്സോഫീസ് നേട്ടം. ഇതോടെ ഇന്ത്യയിലെ ചിത്രത്തിന്‍റെ കളക്ഷന്‍ 38 കോടിയായി ഉയര്‍ന്നിട്ടുണ്ട്. റിലീസ് ദിനത്തില്‍ ചിത്രത്തിന്‍റെ ആഭ്യന്തര നെറ്റ് കളക്ഷന്‍ 5.25 കോടിയായിരുന്നു. രണ്ടാം ദിനത്തില്‍ വന്‍ അഭിപ്രായം ലഭിച്ചതോടെ ഇത് 8.6 കോടിയായി ഉയർന്നു. ആദ്യ ഞായറാഴ്ച ഇത് 10.5 കോടിയായും വര്‍ദ്ധിച്ചു. തിങ്കളാഴ്ച ചിത്രം 7.15 കോടിയാണ് നേടിയത്.