ഡീപ്‌സീക്കിന് വീണ്ടും പുതിയ റെക്കോർഡ്; ഫെബ്രുവരിയില്‍ ചാറ്റ്ജിപിടിയെ മറികടന്നു

ബെയ്ജിങ്: 2025 ഫെബ്രുവരിയില്‍ പുതിയ ഉപയോക്താക്കളുടെ എണ്ണത്തില്‍ അമേരിക്കന്‍ എഐ ഭീമന്‍മാരായ ഓപ്പണ്‍ എഐയുടെ ചാറ്റ്ജിപിടിയെ മറികടന്ന് ചൈനീസ് ആര്‍ട്ടിഫിഷ്യല്‍ ഇന്റലിജന്‍സ് (AI) സ്റ്റാര്‍ട്ടപ്പായ ഡീപ്‌സീക്ക്. ഫെബ്രുവരിയില്‍ ചാറ്റ്ജിപിടിയേക്കാള്‍ കൂടുതല്‍ പുതിയ ഉപയോക്താക്കള്‍ ഡീപ്സീക്കിന് ലഭിച്ചു. ഫെബ്രുവരിയില്‍ ഡീപ്‌സീക്കില്‍ 52.47 കോടി പുതിയ ഉപയോക്താക്കളെ രേഖപ്പെടുത്തി. ഇതേ കാലയളവില്‍ ഏകദേശം 50 കോടി പുതിയ ആളുകളാണ് ചാറ്റ്ജിപിടി വെബ്സൈറ്റ് സന്ദര്‍ശിച്ചത്. ഡീപ്‌സീക്കിലേക്ക് വരുന്ന പുതിയ ആളുകളുടെ എണ്ണം ചാറ്റ്ജിപിടിയേക്കാള്‍ കൂടുതലാണെന്ന് ഈ കണക്കുകള്‍ വ്യക്തമാക്കുന്നു.

ഡീപ്‌സീക്ക് ഇന്ത്യയിലും ജനപ്രിയമാണെന്നതാണ് എടുത്തുപറയേണ്ട മറ്റൊരു കാര്യം. രാജ്യാടിസ്ഥാനത്തിലുള്ള വെബ് ട്രാഫിക്കില്‍ ഇന്ത്യ നാലാം സ്ഥാനത്താണ് എന്നാണ് റിപ്പോര്‍ട്ടുകള്‍. 2025 ഫെബ്രുവരിയില്‍ ഡീപ്‌സീക്കിന്റെ വെബ്സൈറ്റില്‍ ഇന്ത്യയില്‍ നിന്ന് 43 ദശലക്ഷത്തിലധികം സന്ദര്‍ശനങ്ങളുണ്ടായി. ഡീപ്‌സീക്ക് എഐ ചാറ്റ്‌ബോട്ടിന്റെ വെബ്സൈറ്റിലേക്കുള്ള ആകെ സന്ദര്‍ശനങ്ങള്‍ 79.2 കോടിയിലെത്തി. 2025 ഫെബ്രുവരിയില്‍ ഡീപ്‌സീക്കിന്റെ വിപണി വിഹിതം 2.34 ശതമാനത്തില്‍ നിന്ന് 6.58 ശതമാനമായി ഉയര്‍ന്നു. എങ്കിലും, എഐ വിപണിയില്‍ ഡീപ്‌സീക്ക് ഇപ്പോഴും ആഗോളതലത്തില്‍ മൂന്നാം സ്ഥാനത്ത് തുടരുന്നു. ഈ പട്ടികയില്‍ ചാറ്റ്ജിപിടി ഒന്നാം സ്ഥാനത്തും കാന്‍വ രണ്ടാം സ്ഥാനത്തും ആണുള്ളത്. ഫെബ്രുവരിയില്‍ 12.05 ബില്യണ്‍ സന്ദര്‍ശകര്‍ ഡീപ്‌സീക്ക് തേടിയെത്തി. ഇതില്‍ 3.06 ബില്യണ്‍ യൂണീക്ക് ഉപഭോക്താക്കളും ഉള്‍പ്പെടുന്നു.